Այդ բոլոր շենքերն էլ, որ վաճառենք՝ գումարը չի բավարարելու ակադեմիական քաղաք կառուցելու համար. Վահրամ Դումանյան

Եթե ակադեմիական քաղաքը իրականություն դառնա, շատ բուհերի մոտ ցանկություն կառաջանա տեղափոխվել այդ գեղեցիկ վայրը և այն կառույցները, որոնք մինչ այդ բուհ են եղել, բայց այլևս կհամարվեն ոչ նպատակահարմար այնտեղ կրթություն իրագործելու համար։ Այս մասին այսօր՝ մարտի 31–ին, լրագրողների հետ հանդիպմանը հայտարարեց Կրթության, գիտության, մշակույթի եւ սպորտի նախարար Վահրամ Դումանյանը. «Որպեսզի այդ գաղափարը իրականություն դառնա, այդ բոլոր շենքերն էլ, որ վաճառենք, այդ գումարը չի բավարարելու ակադեմիական քաղաքն իրականություն դարձնելու համար։ Այդտեղ լուրջ ներդրումներ են պետք»,– ասաց նա։

Հիշեցնենք, որ օրեր առաջ  Արմավիրի մարզի Արագած համայնքի բնակիչների հետ hանդիպմանը, վարչապետ Նիկոլ Փաշինյանը հայտարարել էր, որ գաղափար ունեն Երևանի բուհերի մեծամասնության շենքերը հանել վաճառքի, և ստացված գումարներից Երևանից դուրս կառուցել քաղաք, որը կլինի բուհական, ակադեմիական քաղաք։