1 տարի շարունակ գումար չենք աշխատել. կրկին լոքդաունի դեպքում՝ 100.000 մարդ բողոքի ալիք կբարձրացնի. Աշոտ Բարսեղյան

Տնտեսություն 1 Ապրիլ, 2021 17:39

Հանրային սննդի ոլորտի փորձագետ, «Ռեստորանների ասոցիացիա» ՀԿ հիմնադիր Աշոտ Բարսեղյանը ԼՈՒՐԵՐ.com-ի հետ զրույցում զարմանում է, թե ինչպես են Կառավարության անդամները 2020 թվականի մարտ ամիսը համեմատում 2021 թվականի հետ, այն դեպքում, երբ անցյալ տարի մարտի 16-ից երկրում հայտարարվեց արտակարգ դրություն:

«Կառավարությունը ապրիլի 1 է կազմակերպել, հրճվում են, որ 2021 թվականին, 2020-ի համեմատ, աճ ենք գրանցել: Էկոնոմիկայի նախարարը ասում է՝ զբոսաշրջության ոլորտում աճ ունենք: Այս մարդկանց բառախաղը ցույց է տալիս, որ աներեսաբար ստում են և ակնհայտորեն մոլորեցնում իրենց ընտրողներին, այսինքն՝ անկիրթ, անգրագետ խավին խաբում են, ասում՝ տեսեք, թե ինչքան լավ ենք աշխատում, թվերը լավ են, բոլոր ոլորտներում աճ ենք գրանցում: 2020 թվականին Արսեն Թորոսյանը «գիտակցված լոքդաուն» էր հայտարարել՝ կոչ անելով դադարեցնել ռեստորան-սրճարանային այցելությունները։ Մարդկանց ուղղակի փակեցին իրենց բնակարաններում՝ առանց փոխհատուցելու, նույնիսկ չգիտեին, որ պարտավոր էին հատուցել, այսինքն՝ Կառավարությունը ապացուցում է, որ անմիտ գործողությունների աշխարհի չեմպիոն է: Ինքը փակում է տնտեսությունը, հատուցումներ չի տալիս, իսկ լոքդաունից հետո պանդեմիան շարունակվեց և ունենք այն, ինչ ունենք»,- նշեց Բարսեղյանը:

ՀԿ հիմնադիրը նկատեց, որ, թեև Առողջապահության նախարարությունը կոչ է անում հետևել համավարակի կանոններին, քանի որ օր օրի կորոնավիրուսի թվերն ավելանում են, այնուամենայնիվ, իշխանությունը՝ քաղաքական նպատակներով պարբերաբար այցեր ու հավաքներ է կազմակերպում, ԱՆ-ն էլ լուրջ գործողություններ իրականացնելու փոխարեն՝ ֆեյսբուքյան գրառումներ է կատարում:

«Կառավարությունը շարունակում է քաղաքականցված պահել և՛ Առողջապահության, և՛ Էկոնոմիկայի նախարարությունները: Մենք տեսնում ենք մեկին, ում Արսեն Թորոսյանը իր փոխարեն նստեցրել է որպես նախարար, այսինքն՝ ԱՆ-ում ոչինչ չի փոխվել, այդ աղջիկն էլ ոլորտի մասնագետ չէ: Էկոնոմիկայի նախարարին լավ եմ ճանաչում, գիտեմ, որ մաթեմատիկոսի որակավորում ունի և թվերին լավ է տիրապետում: Ի՞նչն է իրեն խանգարում այդ թվերը ճիշտ արտաբերել՝ կա՛մ պոպուլիզմը, կա՛մ այս թիմի անդամ դարձած խաբեբայությունը. սուտը դարձել է իրենց այցեքարտը: Վահան Քերոբյանը կա՛մ սուտ է խոսում, կա՛մ մանիպուլացնում է, կա՛մ մաթեմատիկան մոռացել է: Տնտեսության համար լոքդաունը մեկ գրչի հպումով կարող են անել, որովհետև իրենք չեն մտածում ո՛չ տնտեսության, ո՛չ ոլորտների մասին»,- ընդգծեց հանրային սննդի ոլորտի փորձագետը:

Բարսեղյանը նկատեց՝ պետությունը պետք է պատշաճ կատարի պետական կառավարման մարմինների վրա դրած պարտավորությունները. «Կառավարությունում տոտալ ոչ կոմպետենտություն է տիրում, ոչ մի նախարար չի զբաղեցնում պաշտոնը՝ համաձայն իր կոմպետենցիաների: Նախարարները նշանակվում-հանվում են՝ ըստ քաղաքական լոյալության. այս պայմաններում մենք չենք կարող խոսել արդյունավետությունից: Նայում եմ Կառավարության անդամների հրճվանքն ու տխրում»:

«Քաղաքական դաշտում քաղաքական դիակ կա, որի գարշահոտն արդեն մի քանի ամիս է՝ ընկել է Հայաստանով մեկ. այդ մարդիկ չեն ուզում գիտակցել, որ իրենք քաղաքական դիակներ են և, որ պետք է թույլ տան, որպեսզի պրոֆեսինալներ գան, զբաղվեն տնտեսությամբ, այլապես մենք այդ ոլորտն էլ տանուլ կտանք, ինչպես չհաջողեցինք անվտանգության հարցերում: Մենք 1 տարի շարունակ գումար չենք աշխատել. ամբողջ հյուրընկալության և հասարակական սննդի ինդուստրիան արդեն մեկ տարի է՝ ոչ միայն գումար չի աշխատել, այլև սեփական միջոցներից այդ մարդկանց աշխատավարձ է վճարել և, եթե եղավ լոքդաուն, ապա հավատացե՛ք՝ 100.000 մարդ ցասում է արտահայտելու»,- եզրափակեց «Ռեստորանների ասոցիացիա» ՀԿ հիմնադիրը:

Արփինե Հակոբյան