Եթե խնդիրը ռեկտորի ընտրությունն է, թող Հոգաբարձուների խորհրդի անդամներն ասեն՝ հարցն օրակարգից հանենք․ ԵՊՀ ՀԽ քարտուղար

Եթե խնդիրը ռեկտորի ընտրության հարցն է, թող Հոգաբարձուների խորհրդի անդամները գան, ազնվորեն ասեն՝ այս հարցն օրակարգից հանենք։ Այս մասին այսօր՝ ապրիլի 1-ին, լրագրողների հետ զրույցում ասաց խորհրդի քարտուղար Միքայել Մալխասյանը՝ անդրադառնալով ԵՊՀ հոգաբարձուների խորհրդի չկայացած նիստին։

«Ընդամենը 2 հոգի է նախապես ասել, որ չի ներկայանալու նիստին։ Մյուսները չներկայանալու մասին սկսել են գրել, հայտնել երեկ երեկոյան եւ այսօր առավոտյան։ Պատճառաբանություններ են ներկայացնում, թե հարմար չէ, մեկը՝ դրսից եմ գալիս, մյուսը՝ անսպասելի խնդիրներ են առաջացել եւ այլն»,- ասաց Մալխասյանը։

Հարցին, իր կարծիքով, ինչն է պատճառը, որ ներկայացուցիչները չեն եկել նիստին, Միքայել Մալխասյանն ասաց. «Երեկ եղավ ասուլիս՝ բարձրագույն կրթության ոլորտում բարեփոխումներ անելու հետ կապված։ Այդտեղ խոսվեց, որ օրենքը մինչեւ վերջնական չընդունվի, դրանից հետո նոր խորհուրդներ չձեւավորվեն, նոր ընտրությունները չեն լինի։ Ռեկտորի ընտրության հարցը նույնպես կար օրակարգում, գուցե դրա հետ կապված լինի։ Այդտեղ իսկապես կարող է լինել տրամաբանական կապ։ Ինձ համար միշտ կարեւոր է եղել աշխատել իրավական ընթացակարգերով։ Պահանջում էր այդ հարցերն օրակարգում ներառել, այո, պահանջում էր, ես դրա հիմքերը նիստի ժամանակ ներկայացրի»։

Նա նշեց, որ դեռեւս նախորդ տարվա հոկտեմբերի 5-ին տեղի չունեցած նիստի օրակարգային հարցերը, որոնցից էր ռեկտորի ընտրությունը, աշխատակարգի համաձայն՝ պետք է ընդհանուր կարգով գումարվող նիստի ժամանակ լինեին օրակարգում.

«Ստացվում է՝ պետք է ամիսներով անգործության մատնվենք, հոգաբարձուների խորհուրդն այնքան ժամանակ չգործի, որ խորհուրդը լուծարվի, ու նոր խորհուրդ հրավիրվի, ինչը կարող է ամիսներ տեւել։ Պետք է առաջնորդվել ԵՊՀ շահերով, չնայել այս կամ այն խմբային շահերի տեսանկյունից։ Այդ հարցերը բերվել էին օրակարգ, եթե անդամներն առարկություն ունեին, կարող էին գալ, տեղում առաջարկել այդ հարցերը հանել օրակարգից։ Խորհրդի ցանկացած անդամ տեղում իրավունք ունի առաջարկել այս կամ այն հարցը ներառել օրակարգ։ Այժմ պետք է նորից գումարվի նիստ՝ նույն օրակարգով»։

Ավելի վաղ ԵՊՀ խոսնակ Գեւորգ Էմին-Տերյանը ֆեյսբուքյան իր էջում գրել էր, որ Կառավարությունը եւ ԿԳՄՍ-ն բոյկոտում են ԵՊՀ հոգաբարձուների խորհրդի նիստը։