«Ես գիրք եմ ստեղծում» ծրագրի մասնակցության հրավեր

«Երևանը 2012 թ. գրքի համաշխարհային մայրաքաղաք» ծրագրի շրջանակներում ՀՀ մշակույթի նախարարությունը՝ Խնկո Ապոր անվան ազգային մանկական գրադարանի և «Զանգակ» հրատարակչության հետ համագործակցությամբ իրականացնում է «Ես գիրք եմ ստեղծում» մանկական գրական, ուսուցողական միջոցառումը, որի նպատակն է երեխաների ու պատանիների շրջանում գրքի և ընթերցանության հետաքրքրության մեծացումը՝ գրքի ստեղծման աշխատանքներին մասնակից դարձնելու միջոցով: Երեխաները կմասնակցեն գրական ստեղծագործությունը ձեռագիր վիճակից գրքի վերածելու վերածելու գործընթացին:

Որպես ծրագրի առաջին փուլ՝ դեռևս տարվա սկզբին իրակականցվեց «Գիրքը, որը փոխեց իմ կյանքը» խորագրով շարադրությունների մրցույթը, որի լավագույն աշխատանքներն էլ լույս կտեսնեն մեկ գրքով: Այն կնկարազարդվի և կձևավորվի երեխաների ու պատանիների կողմից և կտպագրվի նրանց անմիջական մասնակցությամբ:

Ծրագրի երկրորդ փուլում գիրքը պատկերազարդ դարձնելու նպատակով ՀՀ մշակույթի նախարարությունը, Խնկո-Ապոր անվան մանկական ազգային գրադարանը հայտարարում են նկարազարդման մրցույթ: «Ես գիրք եմ ստեղծում» ծրագրի նկարազարդման փուլի մրցույթին կարող են մասնակցել ՀՀ-ում գործող գեղարվեստի դպրոցի սաները, ինչպես նաև նկարելու շնորհ ունեցող 12-16 տարեկան յուրաքանչյուր պատանի, ովքեր հետագայում նաև կմասնակցեն գրքի ձևավորման աշխատանքներին:

Մրցույթին մասնակցելու համար անհրաժեշտ է կից ներկայացվող 30 ստեղծագործություններից որևէ մեկի կամ մի քանիսի համար կատարել նկարազարդումներ և ուղարկել դրանք մասնակցության հայտի հետ միասին (ձևը կցվում է) Խնկո Ապոր անվան ազգային մանկական գրադարան (Տերյան փ. 42/1):

Հայտերի և ստեղծագործությունների ներկայացման վերջնաժամկետն է սեպտեմբերի 31-ը:

Մրցույթի հաղթողների համար սահմանված են հետևյալ մրցանակները՝

* մեկ գլխավոր մրցանակ - համակարգիչ

* երկու խրախուսական մրցանակ - նկարչական պարագաներ

Մրցույթի բոլոր մասնակիցները կարժանանան պատվոգրերի: Մրցանակների և մասնակցության պատվոգրերի հանձնումը կատարվելու է մրցույթի ամփոփիչ փուլում: