Կայացավ Դուդուկի համահայկական փառատոնի բացման արարողությունը

Սեպտեմբերի 14-ին «Մոսկվա» կինոթատրոնում ՀՀ սփյուռքի նախարարության «Իմ Հայաստան» համահայկական փառատոնի շրջանակներում կայացել է Դուդուկի համահայկական փառատոնի բացման հանդիսավոր արարողությունը: Այս մասին տեղեկացնում են ՀՀ սփյուռքի նախարարության լրատվական ծառայությունից:

Ողջույնի խոսքով հանդես է եկել ՀՀ սփյուռքի նախարարության աշխատակազմի ղեկավար Ֆիրդուս Զաքարյանը:

Պարոն Զաքարյանը նշել է, որ Դուդուկի այս փառատոնն իր տեսակի մեջ բացառիկ է: Սեպտեմբերի 14-18-ն անցկացվող փառատոնն առաջին անգամ Հայրենիքում համախմբել է Հայաստանում և Սփյուռքում ստեղծագործող հայ դուդուկահարներին, որոնք Երևանում և Հայաստանի տարբեր մարզերում հանդես կգան համերգային ծրագրերով:

Այս աննախադեպ մշակութային իրադարձությանն իր ուրախության և շնորհավորանքի խոսքն էր հղել նաեւ աշխարհաhռչակ դուդուկահար, մաեստրո Ջիվան Գասպարյանը, ում խոսքի տեսագրությունը ցուցադրվեց հանդիսատեսին:

Այնուհետեւ ցուցադրվել է վավերագրական ֆիլմ հայկական ծիրանափողի մասին: Ժողովրդական փողային նվագարանների ընտանիքում դուդուկն առանձնահատուկ տեղ է զբաղեցնում: Դուդուկը հայ մենակատարի ձեռքին լավագույնս խոսում ու երգում է հայերեն: Իսկ հայրենի հողի վրա հայ վարպետ դուդուկահարներն իրենց պրոֆեսիոնալիզմով բարձրացրել են նվագարանի գեղարվեստական արժեքն ու ստեղծել կայուն ավանդույթներ: Հայկական դուդուկը համաշխարհային բեմ է բարձրացել և համահայկական խորհրդանիշից վերածվել համամարդկայինի:

Միջոցառման ավարտին հնչել են կատարումներ Սփյուռքից ժամանած հայազգի դուդուկահարների կատարմամբ: Կատարումներով հանդես են եկել նաև հայաստանյան երաժիշտներ: