«Հրապարակ». Գեղարքունիքի փոխմարզպետի որդուն ոչ թե հարվածել են, այլ` դաժան ծեծել

Երեկ «Հրապարակ»-ը գրել էր, որ Գեղարքունիքի ոստիկանության մարզային վարչության պետ Վարդան Նադարյանը մեքենան սխալ կայանելու համար վիճաբանել և հարվածել է Գեղարքունիքի փոխմարզպետ Գագիկ Ստեփանյանի որդուն` Սևակ Ստեփանյանին: Վերջինս հիվանդանոցում է' ծնոտի վնասվածք է ստացել և այսօր պետք է վիրահատվի:

«Ուզում եմ ընթերցողին պատմել, թե ինչ պատահեց այն բանից հետո, երբ «Հրապարակը» տպագրեց այս լուրը: Նման լուրերը, որպես կանոն, անարձագանք չեն մնում: Մենք սպասում էինք, որ շուտով կարձագանքեն կամ ոստիկանությունից, կամ մարզպետարանից: Եթե դեպքն արձանագրված չէ` կհերքեն: Սակայն մինչ օրվա վերջ` ոչ մի ձայն: Փոխարենը մեր լուրի տակ ընթերցողներից մեկը լատինատառ «քոմենթ» էր գրել, «ճիշտ չեք մեկնաբանում` չի հարվածել էէէէէէ, ընենց են ծեծել, որ հիվանդանոցում ա»,- գրում է «Հրապարակ»-ը և հավելում.

«Մենք լուրը գրելու պահին գիտեինք, որ դաժան ծեծի են ենթարկել, գիտեինք նաև, որ բանակցություններ են գնում դեպքը հարթելու և կողմերին հաշտեցնելու համար: Այդ պարագայում դեպքը պետք է կոծկեին, տղայի վնասվածքը ներկայացնեին այլ լույսի ներքո և հերքեին մեր գրածը: Օրվա ավարտին երկու իշխանական կայքերով «հերքման» տեքստը գնաց, ի՞նչ ծեծ, ի՞նչ բան' տղան «վազել է ու ընկել»: Այ, այ, այ' փոխմարզպետի տղան վազել չգիտի, ընկնելիս էլ ուղիղ ծնոտի վրա է ընկնում ու ծանր կոտրվածք ստանում: Մենք էլ զանգեցինք տղային, հեռախոսը վերցրեց այլ անձ: Ասաց, որ Սևակն ի վիճակի չէ խոսելու: Հերքեց' ծեծ չի, ընկել է: Իսկ «հերքողն» ո՞վ է' փոխմարզպետ հայրիկը: Կհարցնեք' եթե ծեծող-ծեծվողները հաշտ են, ինչո՞ւ է «Հրապարակը» մտնում մատի ու մատանու արանքը: Թերևս չէինք մտնի, եթե այս անամոթները չհայտարարեին, որ «տեղեկատվությունը հերյուրանք է»: «Հերյուրանք», որ առնվազն մի հազար մարդու հայտնի է»: