ԱԳՆ շենքի վաճառքը բացառված չէ

Վերջին օրերին կրկին շրջանառվում են ԱԳՆ շենքը վաճառելու մասին խոսակցությունները: Շենքի վաճառման մասին հրապարակում եղել է finance.am կայքում: Նշված կայքի հավաստի աղբյուրների համաձայն՝ Հանրապետության հրապարակում տեղակայված ՀՀ ԱԳՆ շենքը վաճառվում է: Իրական գնորդն առայժմ անհայտ է: Ըստ չճշտված տվյալների՝ գնորդների ցանկում են աշխարհահռչակ մի քանի հյուրանոցային ցանցեր:

Lurer.com-ի հետ զրույցում ՀՀ ԿԱ պետական գույքի կառավարման վարչության մամուլի բաժնի պատասխանատու Մարգարիտ Սարգսյանն ասաց, որ այս պահին ԱԳՆ-ի շենքը վաճառելու մասին խոսք չկա, սակայն տեսականորեն բացառված չէ. «Գուցե ինչ-որ խոսակցություններ ընթանում են, բայց եթե որևէ շենք պետք է վաճառվի, որտեղ պետական գերատեսչություն է տեղակայված, նախ հարկավոր է այդ շենքի տեղափոխման խնդիրը լուծվի: Այսինքն, այս պահին առաջնահերթ է այդ շենքի կառուցումը»:

Մարգարիտ Սարգսյանի խոսքերով՝ պետական գույքի կառավարման վարչությունը ինքնիրեն ոչինչ չի վաճառում և կատարում է կառավարության որոշումները, իսկ կառավարությունում  նման որոշում չի եղել: