Քոչարյանը նախագահի ստատուսը չպետք է իջեցներ այդ աստիճանի. Արամ Կարապետյան

Lurer.com-ի զրուցակիցն է «Նոր ժամանակներ» կուսակցության նախագահ Արամ Կարապետյանը.

- Պարո՛ն Կարապետյան, վերջին օրերին նկատելի է, որ ՀՀ երկրորդ նախագահ Ռոբերտ Քոչարյանը սկսել է արձագանքել Հայաստանում կատարվող իրադարձություններին, դրանցից են՝ Սաֆարովի արտահանձման մասին հայտարարությունը, Ռուբեն Հայրապետյանի հարցազրույցին արձագանքը: Ինչո՞վ կպայմանավորեք նման ակտիվությունը և ինչպե՞ս կմեկնաբանեք։

- Չէի ուզենա դա մենկաբանել: Այդ հարցի հետ կապված կարող եմ ասել միայն մի բան, որ կան դեպքեր, երբ երկրորդ նախագահ եղած մարդը լավ կլինի ընդհանրապես որևէ բանի չարձագանքի, քան արձագանքի այդ մակարդակով: Մասնավորապես Ռուբեն Հայրապետյանի հարցազրույցի վերջին մասը: Ես կարծում եմ, որ նախագահի ստատուս ունեցած մարդը, թեկուզ չընտրված, բայց այդ ստատուսն ինչ-որ ձևով ձեռք բերած, մի քիչ այլ կարգավիճակում պետք է հանդես գա: Մարդն ամեն ոճի կարող է լինել, բայց նախագահի ստատուսը վերցնել ու իջեցնե՞լ: Կարող է վաղն էլ ինչ-որ մեկը հայհոյանք տա, նախագահ եղած մարդը պետք է ելնի և հայհոյի՞:

- Կան խոսակցություններ, որ Ռոբերտ Քոչարյանը նախագահական ընտրություններում կարող է լինել ԲՀԿ թեկնածու: Որքանո՞վ եք դա հավանական համարում։

- Ես կասեմ իմ տեսակետն ընդհանուր քաղաքական դաշտի վերբերյալ: Ես կարծում եմ՝ յուրաքանչյուր ուժ, որը վերջիվերջո իրեն կկապի այդ երեք նախագահների հետ, այդ ուժը քաղաքական առումով բավականաչափ ծանր կացության մեջ կհայտնվի: Դա կլինի հիմա, մեկ տարի հետո, մեկ ամիս հետո, բայց, միևնույնն է, այդպես է լինելու: Այս երեք նախագահների ժամանակշրջանն ավարտվել է: Նրանք պետք է թողնեն դաշտը, դուրս գան և բացեն ճանապարհ նոր մարդկանց համար: Հիմա իրենք կամովին դա չեն ուզում, պարզ է:

Կա ժամանակաշրջանի խնդիր և «անդրոպովյան» ժամանակվա գործիչների ժամանակը վերջանում է:

- Նախագահական ընտրություններում առաջադրվելու Ձեր որոշումը մնո՞ւմ է անփոփոխ։

- Այո, դա վերջնական է, անփոփոխ է, բեկանման ենթակա չէ: Միակ խնդիրը մնում է, որ ինձ գրանցեն:

- Իսկ ի՞նչ խնդիրներ կան գրանցման հետ կապված։

- Գիտեք, ես միշտ ունեմ այդ խնդիրներն իշխանության հետ. իշխանությունը փոխվում է, բայց խնդիրները չեն փոխվում: Ինձ ասում են, որ ես տասը տարի Հայաստանում չեմ բնակվել, այն պարագայում, երբ 2003-ին նախագահի թեկնածու եմ եղել և հաշվարկը ցույց է տալիս, որ 2013-ին տասը տարին լրանում է:

- Իսկ ի՞նչ եք պատրաստվում անել։

- Չնայած այդ բոլոր դժվարություններին՝ կարծում եմ, որ ինձ վերջիվերջո կգրանցեն: Եթե չեն գրանցի, ես իմ ծրագրերն ունեմ, որոնց մասին լրագրողների հետ չեմ կիսվի:

Հիշեցնենք, որ ՀՀ նախկին նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանն օրեր առաջ, անդրադառնալով ֆրանսիական «Նուվել դ'Արմենի» ամսագրում Ռուբեն Հայրապետյանի տված հարցազրույցին, ասել էր, որ ԱԺ պատգամավոր Ռուբեն Հայրապետյանին «այսօր չեն բշտում թերևս միայն կուսակիցներն ու ալարկոտները»:

Ազատուհի Արասխանյան