Հովհաննես Ազոյանի մանկական երազանքը

«Պահանջվում է միլիոնատեր» և «Փեսացուն կրկեսից» ֆիլմերի ստեղծագործական և պրոդյուսերական թիմերը կրկին համախմբվել են նոր կինոնախագծի շուրջ: «ՇԱՐՄ Հոլդինգ»-ը ներկայացնում է նոր արկածային կինոկատակերգություն՝ «Սիրո պոկեր» վերնագրով:

Ֆիլմն էկրան կբարձրանա հոկտեմբերին, մինչ այդ «ՇԱՐՄ Հոլդինգ»-ը գլխավոր հերոսների հետ հարցազրույցներ է ներկայացնում նկարահանման հրապարակից: Ներկայացնում ենք Հովհաննես Ազոյանի հետ զրույցը.

-Ի՞նչ խառնվածքի տեր է քո հերոսը:

-Այս ֆիլմում իմ կերպարը երեք տարբեր հոգեվիճակում է հայտնվում. սկզբում նա մի քիչ մոլորված ու անվստահ երիտասարդ է, հետո նրա խաղաղ կյանքում առաջ են գալիս խնդիրներ, որոնք, թվում է, անելանելի վիճակի մեջ են իրեն գցում, և վերջում նա կարողանում է հավաքվել, վճռականություն դրսևորել և, կարելի է ասել, հերոս դառնալ:

-Սանրվածքդ պայմանավորված է սցենարո՞վ և ռեժիսորի ցանկությա՞մբ, թե՞ քո որոշումն էր:

–Դե՛, ֆիլմի սկզբում իմ խուճուճներով եմ, և ի սկզբանե հենց այդպես էլ որոշված էր, բայց վերջում սանրվածքս ոճային փոփոխության է ենթարկվում՝ դա արդեն ըստ սցենարի և ռեժիսորի մտահղացման: Բայց ասեմ, որ այդ ոճն ինձ դուր չի գալիս, ես գերադասում եմ իմ առօրյա սանրվածքը:

–«Պահանջվում է միլիոնատեր» և «Փեսացուն կրկեսից» ֆիլմերի համեմատ ի՞նչ նորույթ կարող է ակնկալել հանդիսատեսը:

–Սա ավելի մասշտաբային ֆիլմ է, աշխարհագրությունն ավելի լայն է և, հետևաբար, աշխատանքն էլ` ավելի շատ: Եվ այստեղ իրադարձությունները միաժամանակ մի քանի ուղղությամբ են զարգանում: Նախորդ երկու ֆիլմերից ինձ առավել դուր էր եկել «Փեսացուն կրկեսից»-ը, բայց կարծում եմ, որ իր հետաքրքրությամբ այս ֆիլմը գերազանցելու է թե´ առաջին և թե´ երկրորդ ֆիլմերը:

–Հումորային դերերը քեզ հե՞շտ են տրվում, իսկ ուրիշ ի՞նչ կերպարներ կցանկանայիր մարմնավորել:

–Ես շատ կուզենայի երկրորդական դերեր խաղալ… կարելի է ասել՝ իմ երազանքներից մեկն է…

–Ինչո՞վ դա կբացատրես. համաձայնիր՝ տարօրինակ ցանկություն է:

-Գլխավոր դերում միշտ շատ ավելի լարված ես, և գրեթե անշեղ հետևում ես սցենարին…, իսկ երկրորդական դերում հնարավորություն ունես մի քիչ ավելի խենթ լինել ու ավելի ազատ մարմնավորել քո կերպարին:

esyes.am