1976թ. այս օրը փրկվեցին Երևանյան լիճն ընկած տրոլեյբուսի ուղևորները

1976 թվականի սեպտեմբերի 16-ին սուզալողորդ Շավարշ Կարապետյանը փրկել է Երևանյան լիճն ընկած տրոլեյբուսի ուղևորներին:  Դեպքի պահին նա ավարտում էր ամենօրյա 20 կմ վազքը և տեսնելով կատարվածը՝ անմիջապես ջուրն է նետվել՝ օգնություն ցույց տալու խեղդվող մարդկանց։ Նրան օգնել է եղբայրը՝ Կամո Կարապետյանը։ 10 մետր խորության վրա` զրոյական տեսանելիության պայմաններում Շավարշ Կարապետյանը ոտքերով կոտրել է տրոլեյբուսի հետին ապակին և մեկ առ մեկ դուրս բերել 20 ուղևորի: Մյուս ուղևորներին փրկել չի հաջողվել: Դրանից հետո Շավարշ Կարապետյանը հիվանդացել է թոքերի բորբոքումով, ինչն էլ հանգեցրել է հաշմանդամության և սպորտային կարերիայի ավարտի:

Շավարշ Կարապետյանը ջրասուզալող սպորտաձևում 11 անգամ դարձել է աշխարհի ռեկորդակիր, 17-անգամ՝ աշխարհի չեմպիոն, 13-անգամ՝ Եվրոպայի չեմպիոն, ԽՍՀՄ յոթակի չեմպիոն: Պարգևատրվել է «Պատվո նշան» շքանշանով և Յունեսկոյի «Արդար խաղ» (Ֆեյր փլեյ) մրցանակով: Աշխատել է պատանեկան դպրոցի տնօրեն:

1993 թվականից Շավարշ Կարապետյանը ընտանիքի հետ ապրում է Մոսկվայում:

Մարզիկի անունով է կոչվել աստերոիդ (3027 Շավարշ)։ Ռուսաստանի Ռիբինսկ քաղաքում Շավարշ Կարապետյանի անվան սուզալողի մրցումներ են անց կացվում: