«ՉԻ». Սկանդալ. Հեռացող Ֆասյեն արդեն խոսում է օկուպացիայից

«ԵԱՀԿ Մինսկի խմբի ֆրանսիացի համանախագահ Բեռնար Ֆասյեն, ով եկող տարվա հունվարից լքելու է այդ պաշտոնը, Ֆրանսիայի Սենատում “Հայաստանի եւ Ադրբեջանի միջեւ հակամարտությունը, մոռացված հակամարտություն” եւ “ԵԱՀԿ Մինսկի խմբի ֆրանսիացի համանախագահը” թեմաներով կլոր սեղանին սենսացիոն հայտարարություն է արել: Ըստ ադրբեջանական ԶԼՄ-ների, իր ելույթում Ֆասյեն ասել է, թե չնայած այն հանգամանքին, որ խումբն իր գործունեությունը սկսել է 1994-ի մայիսին, հիմնական աշխատանքները սկսվել են կյանքի կոչվել 1997 թվականից հետո: “Այսօր սեղանի վրա գտնվող փաստաթղթի յուրաքանչյուր տարբերակը փաստաթուղթ է, որը մեր կողմից մշակվել է 2005 թվականից: Իհարկե ես ինքս էլ շատ լավ հասկանում եմ Ադրբեջանի ցավը` այդ երկրի հողերը օկուպացված են: Որպես ֆրանսիացի` ես լավ գիտեմ, թե ինչ է նշանակում օկուպացիան, սակայն Մինսկի խմբին անգործության մեջ մեղադրելն արդար չէ: Մենք կողմերին չենք կարող ստիպել վերջնական տարբերակ ընդունել: Կողմերն իրենք պետք է համաձայնության գան, մենք պետք է օգնենք նրանց այդ հարցում”,- բառացիորեն ասել է Ֆասյեն: Այսինքն, հակամարտության կարգավորմամբ զբաղվող համանախագահներից մեկը, ում խնդիրը կողմերի համար փոխընդունելի եւ փոխզիջումային տարբերակներ առաջարկելն է, փաստացի Հայաստանին մեղադրում է Ադրբեջանի հողերը օկուպացնելու մեջ: Սա բավականին սկանդալային հայտարարություն է, ինչին ՀՀ ԱԳՆ-ն ուղղակի պարտավոր է արձագանքել: Ի դեպ, 2009-ի նոյեմբերին ՀՀ-ում ԱՄՆ դեսպանատանը կայացած Մինսկի խմբի համանախագահների համատեղ ասուլիսի ժամանակ, երբ հարց էր հնչել, թե ե՞րբ են միջնորդները հաշվի առնելու նաեւ ԼՂ-ի կարծիքը, Բեռնար Ֆասյեն այսպիսի պատասխան էր տվել` “Մենք արդեն շատ բան գիտենք ԼՂ բնակչության դիրքորշման վերաբերյալ: Երբեմն որոշ մարդիկ Երեւանում կամ Ստեփանակերտում այնպիսի կարծիքներ են հայտնում, թե ԼՂ բնակչությունը կամ ղեկավարությունը կարգավորման գործընթացից բացառված է: Դա այդպես չէ, այն պատճառով, որ արդեն վաղուց մարդիկ Ստեփանակերտում հանդիպում են ունենում ՀՀ կառավարության գլխավոր դեմքերի հետ, եւ որ համանախագահները շատ հաճախ են լինում Ստեփանակերտում: Ինչպես արդեն մի անգամ ասել եմ, մենք Ստեփանակերտ չենք գնում միայն թթի օղի խմելու համար, մենք նաեւ աշխատում ենք եւ` լրջորեն”: Փաստորեն, Ֆասյեն հենց թթի օղի խմելու համար էր գնում Ստեփանակերտ, ինչին ի դեպ, լավագույնս նպաստում էին թե ՀՀ, թե ԼՂՀ ԱԳՆ-ները` իրենց անգործությամբ»՝ հայտնում է թերթը: