ՔՊ-ական նախարարի անգործության 10 ամիսները

Շուտով կլրանա մեկ տարի, ինչ շրջակա միջավայրի պաշտպանության նախարարի պաշտոնն է ստանձնել Կոտայքի նախկին մարզպետ Ռոմանոս Պետրոսյանը: Թեև վերջինս պաշտոնը ստանձնելուց հնչեցրել էր մեծամեծ խոստումներ, սակայն, պետք է փաստենք, որ ՔՊ-ական նախարարի պաշտոնավարման ամիսները աչքի են ընկել բնավ էլ ոչ իր բուռն աշխատանքային գործունեությամբ, այլ սկանդալներով, չկատարված խոստումներով և տարակուսելի հայտարարություններով:

Դիցուք՝ Ռոմանոս Պետրոսյանը Ֆեյսբուքի իր էջում այնպիսի գրառում էր արել, որը լրջորեն հիմք է տալիս կասկածի տակ առնել նախարարի հիշողությունը՝ արդո՞ք նա ընդհանրապես հիշում է, թե օրեր առաջ ինչ պաշտոնի է նշանակվել: Դիցուք նա գրել է՝ «Հարկային տարվա խոշոր հարկատուների առաջին տասնյակում 2-ը ներկայացնում են այս ոլորտը։ Հանքարդյունաբերության ազդեցությունը մեր երկրում մրցունակ տնտեսություն ունենալու, ներդրումային ոլորտի խթանման, սոցիալական խնդիրների լուծման և տարածաշրջանի զարգացման վրա շարունակում է մնալ կարևոր և ենթադրում է խիստ զգուշավոր վերաբերմունք»։  Դժվար է անգամ պատկերացնել, որ հատուկ վարձած լոբբիստների մի ամբողջ խումբ ավելի լավ «փիառ» կարող էր անել հանքաարդյունաբերության յուղոտ բիզնեսի մեջ թաթախված հանքերի սեփականատերերին, քան դա անում է նախարար Պետրոսյանը: Սակայն, հուշենք նախարարին, որ նա այդ պաշտոնին նշանակվել է բնությունը, այլ ոչ թե հանքերի սեփականատերերի շահերը պաշտպանելու համար: 

Հաջորդը ինչով պաշտոնավարման ինը ամիսներին աչքի է ընկել Ռոմանոս Պետրոսյանը այն է, որ  նախարար դառնալուց ի վեր Խոսրովի արգելոցի կանոնադրությունը և հաստիքացուցակը քանիցս փոխվել է, ինչի հետևանքով մի շարք աշխատակիցներ ազատվել են աշխատանքից, նրանց աշխատանքային իրավունքները կոպտորեն խախտվել են և մնացել անհետևանք։ Հիշեցնենք, որ պաշտոնը ստանձնելիս Պետրոսյանը խոստանում էր կադրային ջարդ չիրականացնել:

Պաշտոնավարման ամիսներին նախարարը նաև հերքումներ տարածելու և իրեն քննադատողների դեմ դատական հայցեր ներկայացնելու ռեկորդներ է խփել, չնայած նշենք, որ այս հարցում Պետրոսյանը պակաս ակտիվ չէր նաև մարզպետ եղած ժամանակ:

Պետրոսյանը նաև հասցրել է ոլորտին առնչվող խնդիրները քննարկել մի շարք ՀԿ-ի հետ, սակայն, ուշագրավն այն է, որ նախարարի հետ հանդիպման հրավիրված բոլոր ՀԿ-ը այսպես կոչված սորոսական ՀԿ-ր էին, ինչը, իհարկե, սովորական պատահականություն լինել չի կարող:

Նախարարի մյուս խոստումն էլ վերաբերվում էր Սևանի ափամերձ տարածքը օլիգարխների օբյեկտներից մաքրելուն, գործընթացը, ի դեպ, մեկնարկել է, սակայն Պետրոսյանը, կարծես թե, որոշել է հավատարիմ մնալ ավանդույթներին և յուրայինների համար արտոնություններ սահմանել: Մասնավորապես՝ Սամվել Ալեքսանյանի և Սասուն Միքայելյանի օբյեկտները քանդման ենթակա շինությունների ցանկից հրաշքով դուրս են մնացել: Իսկ այդ հրաշքի անունը, թերևս, Ռոմանոս Պետրոսյան է:

Ինչպես տեսնում ենք` ՔՊ-ական նախարարի բուռն աշխատանքային իմիտիացիան անգամ չի հաջողել, քանի որ վերջինիս աշխատանքային հաջողությունները արտացոլված չեն անգամ նախարության կայքում, իսկ այս իշխանությունները, ինչպես գիտենք, հաջողացնում են փիառվել անգամ մեկ տնկված ծառի վրա...