ԲՀԿ–ի համար վարչապետի աթոռը երկրորդական է

Lurer.com-ը Սերժ Սարգսյանի՝ Կառավարության նիստում ունեցած ելույթի վերաբերյալ զրուցեց ԲՀԿ խոսնակ Տիգրան Ուրիխանյանի հետ։

Անդրադառնալով Սերժ Սարգսյանի ելույթին՝ նա ասաց. «Ինձ համար ուրախալի է այն հանգամանքը, որ մեր կողմից առաջ քաշված և արդեն երկար ժամանակ առաջ քաշվող օրակարգային խնդիրները օրակարգային դարձան նաև քաղաքական մեծամասնության համար, նվազագույնը՝ իրենց առաջնորդի՝ հանրապետության նախագահի համար, որը և հանդես եկավ համապատասխան քննադատությամբ։ Ես ցանկանում եմ, շատ եմ ցանկանում հավատալ, որ այս իրադարձությունը կազդարարի մեկնարկ այն փոփոխությունների, որոնք ի վերջո պիտի տանեն մեր երկիրը դեպի բարգավաճում, զարգացում ու առաջընթաց»։

Այն հարցին, թե արդյոք սա նախագահական ընտրություններին ընդառաջ իրականացված PR ակցիա չէր, պարոն Ուրիխանյանը պատասխանեց. «Դրա համար ես ասում եմ, որ ցանկանում եմ հավատալ, իսկ թե արդեն ինչ նպատակներից, ինչ նկատառումներից ելնելով է արվում դա, կցանկանայի այս պահին զերծ մնալ մեկնաբանություններից՝ եզրակացությունները թողնելով հանրությանը»։

Անդրադառնալով այն խոսակցություններին, որ սա նաև հաղորդագրություն էր՝ ուղղված «Բարգավաճ Հայաստանին»՝ կապված վարչապետի աթոռի հետ, նա ասաց. «Բարգավաճ Հայաստանը պատրաստ է ու միշտ պատրաստ է եղել ստանձնել ամբողջական կամ մասնակի կառավարում, մտնելու պատասխանատվության տակ, մտնելու բեռի տակ, բայց միմիայն այն պարագայում, եթե չլինի որևէ նախապայման, մեր ուրույն քաղաքական կուրսը կաշկանդող որևէ հանգամանք կամ առավել ևս պարտադրանք։ Դա է մեզ համար առաջնայինը։ Միմիայն այդ պարագայում մենք կգնանք կառավարման ոլորտ։ Այստեղ որևէ այլ հանգամանք երկրորդական է»։

Այն պնդմանը, թե այս ամենից կարող ենք եզրակացնել, որ վարչապետի աթոռը «Բարգավաճ Հայաստանի» համար երկրորդական է, նա պատասխանեց. «Ցանկացած պարագայում առաջնայինը համոզմունքն է, առաջնայինը մեր սեփական քաղաքականությունն իրականացնելու հնարավորությունն է»։