ՀՀ ԱԻՆ փրկարարների պատանեկան թիմը մեկնեց Բելառուս

Այս գիշեր Բելառուսի մայրաքաղաք Մինսկ մեկնեց ՀՀ ԱԻՆ փրկարարների մանկապատանեկան թիմը, որը պիտի սեպտեմբերի 17-23-ը մասնակցի ազգային մանկական կրթական-առողջապահական «Զուբրյոնոկ» կենտրոնում կազմակերպվելիք պատանի հրշեջ-փրկարարների միջազգային հավաքին:

Դեռևս հունիսին հայտարարված բաց մրցույթի արդյունքում ԱԻ նախարարությունում մայրաքաղաքի և մարզային դպրոցներից ընտրվել էին 12-16 տարեկան 7 երեխա (2 աղջիկ և 5 տղա):

Մասնակիցներին ընտրելիս հաշվի են առնվել նրանց առաջադիմությունը դպրոցում, գիտելիքներն արտակարգ իրավիճակների վերաբերյալ և գեղարվեստական ընդունակությունները, քանի որ հավաքի ընթացքում լինելու են տարբեր մրցույթներ ու մասնակիցները պետք է նաև փոքրիկ գեղարվեստական համարով ներկայացնեն իրենց երկիրը:

Ընտրական փուլը հաղթահարած երեխաների համար կազմակերպվել են հատուկ դասընթացներ (փրկարարական գործ, հրդեհաշիջում, առաջին բուժօգնություն, լող և այլն), ինչպես նաև տրամադրվել է հրշեջ-փրկարարի համազգեստ:

Մեկնումից առաջ ՀՀ ԱԻՆ արտաքին կապերի վարչության աշխատակից, պատվիրակության ղեկավար Աղվան Սարգսյանը շնորհակալություն հայտնեց ԱԻ նախարար Ա. Երիցյանին, փրկարար ծառայության ղեկավարությանն ու երեխաների ծնողներին՝ աջակցության համար, նշելով, որ իրենք կաշխատեն միջազգային հավաքում բարձր պահել ՀՀ ԱԻ նախարարության անունը:

ԱԻՆ պատանեկան թիմի անդամ պատանիները նույնպես շատ ոգևորված էին ու խոստացան պատվով կրել հայ հրշեջ-փրկարարի համազգեստը: