Հերքել անհերքելին. ՔՊ-ական մարզպետը կրկին հայտնվել է զավեշտալի իրավիճակում

Գեղարքունիքի մարզպետ Գնել Սանոսյանը շարունակում է խփել ինքն իր ռեկորդները: Խոսքը ոչ թե արդյունավետ աշխատանքի, այլ ստերի ռեկորդներն են, որոնց վրա մարզպետը պատերազմից հետո ավելի ու ավելի հաճախ է սկսել բռնվել: Դիցուք՝ պատերազմից հետո, երբ խնդիր էր առաջացել Սոթքի հանքի պատկանելիության հետ, վերջինս կարծիք էր արտահայտում, որ հանքը մնալու է հայկական կողմին, իհարկե հետո իշխանությունները ստիպված էին ընդունել, որ, այո, հանքը հանձնվում է Ադրբեջանին: Մարզպետը խոսում էր այն մասին, որ մարզում պատերազմի հետևանքները մեղմելուն ուղղված քայլեր են գործարկվելու, այսօր նա հայտարարում է, որ Սոթքի հանքի 200-ից ավել աշխատակիցներ կրճատվել են: Հարց է առաջանում` իսկ մի քանի տարի շարունակ ոչինչ չարած մարզպետը պատրաստվու՞մ է լուծել անգործ մնացած քաղաքացիների խնդիրները, թե ոչ: Թերևս` ոչ:

Երբ պատերազմից հետո Սևանի մոտակաքյից ադրբեջանցիների խնջույքների տեսանյութեր էին տարածում, մարզպետը կտրականապես հերքում էր որ դա Սևանն է: Երեկ էլ Սանոսյանը փորձում էր հանրությանը համոզել, որ ադրբեջանցիները չեն հատել ՀՀ պետական սահմանը, ըստ նրա՝ ադրբեջանցիները որոշակի աշխատանքներ էին անում նոյեմբերին իրենց վերահսկողության տակ անցած տարածքներում, որտեղ չէին տեղակայվել մինչ օրս ձյան պատճառով: Փաստորեն, Վերին Շորժան, ըստ Սանոսյանի, ադրբեջանական տարածք է, որովհետև այսօր ակնհայտ դարձավ, որ ադրբեջանցիներն ամեն դեպքում հատել են ՀՀ սահմանը և գտնվում են Վերին Շորժայի մատույցներում: