«168 ժամ». Սերժ Սարգսյանը պետական գործչի դասական օրինակ է. Շարմազանով

«Հասկացող ու վերջին տարիներին քաղաքականությամբ զբաղված անձը, լինի դա քաղաքական գործիչ թե փորձագետ, հստակ պետք է գիտակցի, որ նախագահ Սերժ Սարգսյանի գործունեության ողջ ընթացքում շոուներն ու քաղաքական PR-ը ոչ մի նշանակություն չեն ունեցել»,- այս մասին երեկ «168 ժամ»-ի թղթակցի հետ զրույցում ասել է ՀՀԿ մամուլի խոսնակ էդուարդ Շարմազանովը` անդրադառնալով «Նոր ժամանակներ» կուսակցության նախագահ Արամ Կարապետյանի այն հայտարարությանը, թե կառավարությունում ՀՀ նախագահ Սերժ Սարգսյանի անցկացրած խորհրդակցությունը «վատ կազմակերպված շոու էր»:

Էդ. Շարմազանովի խոսքով` նախագահի շաբաթ օրվա ելույթը ցույց տվեց, որ ի դեմս Ս. Սարգսյանի, «Հանրապետությունն ունի ղեկավար, ով անհանդուրժող է ցանկացած վատ, կոռուպցիոն ու հակաօրինական երևույթներին` անկախ նրանից, թե այդ երևույթն իրականացնողը իր քաղաքական թիմի անդա՞մ է, թե՞ ոչ»:

Նա նաև հավելել է. «Ի տարբերություն շատ նախկին ղեկավարների՝ Ս. Սարգսյանը ոչ թե թաքուն է խոսում խնդիրների մասին, այլ բացահայտ է խոսում, հստակ կշտամբում է, պահանջներ է դնում' խնդիրները լուծելու նպատակ: Ու սա պետական գործչի դասական օրինակ է: Իսկ բոլոր նրանք, ովքեր խոսում են շոուներից, պարզապես չստացված շոուների մասնագետներ են»: