«ՀԺ». Հայաստանում իսլամիստների կողմից ահաբեկչական գործողությունների հավանականության մասին լուրերը անհիմն չեն

Անցած շաբաթ օրը ՀՀ ոստիկանության Երևանի կենտրոնի բաժնում աննախադեպ մեծ հավաք էր: Տարօրինակն այն էր, որ բաժնին հարող տարածքներում կային նաև կինոլոգներ` իրենց հատուկ վարժեցված շների հետ: Այդ շներին սովորաբար օգտագործում են այն ժամանակ, երբ հաղորդում է ստացվում այս կամ այն հաստատությունում տեղադրված ռումբի մասին: «Հայկական ժամանակ»-ի թղթակցի հարցին, թե ինչ է պատահել, ոստիկանները խորհրդավոր ժպտում էին և ասում, թե կանխարգելիչ միջոցառումներ են իրականացվում: Սակայն, նույն երևույթն արձանագրվեց նաև անցած երկու օրերին:

Ոստիկանության հասարակայնության հետ կապերի և լրատվության վարչության պետ Աշոտ Ահարոնյանին հղած պաշտոնական հարցմանն ի պատասխան՝ թերթը ստացավ նույն «պարզաբանումը» կանխարգելիչ միջոցառումների մասին: Սակայն, օրվա երկրորդ կեսին հայտնի դարձավ, որ ոստիկանական գործողությունները այնքան էլ «անշառ» չեն:

«ՀԺ»-ի ունեցած տեղեկություններով, ԱՄՆ-ի զգուշացումները` Հայաստանում իսլամիստների կողմից ահաբեկչական գործողությունների հավանականության մասին, անհիմն չեն: Այն տեղեկատվությանը, որի հիման վրա ԱՄՆ-ն հայտարարություն է արել, տիրապետում են նաև մեր իրավապահները: Ըստ «ՀԺ» ունեցած տեղեկությունների, իրավապահները զգուշացրել են մեծ ձեռնարկությունների, առևտրի կետերի, պետական հիմնակությունների ղեկավարներին, որպեսզի նրանք անմիջապես տեղեկացնեն նկատված տարօրինակ իրերի մասին: Առաջին ահազանգը եղել է կիրակի առավոտյան՝ երկու կասկածելի փաթեթ են գտել Աբովյան փողոցի «ՍԱՍ» սուպերմարկետում: Համապատասխան ստորաբաժանումներն օպերատիվ արձագանքել են ահազանգին, բայց պարզվել է' դրանցում կենցաղային իրեր են:

Թերթը նկատում է, որ իրավապահները փորձում են հնարավոր ահաբեկչության մասին տեղեկատվությունը գաղտնի պահել՝ խուճապից խուսափելու համար, ինչը լրիվ հասկանալի է և ընդունելի: Ահաբեկչության հավանականությունն էլ գնահատվում է ոչ մեծ: Բայց նախընտրելի է մի քիչ ավելի զգույշ և ուշադիր լինել: