ՔՊ-ական պաշտոնյաներից ովքե՞ր են «ջրից չոր» դուրս եկել. մաս 8

Շարունակում ենք  ընթերցողի ուշադրությանը ներկայացնել ՔՊ-ական այն պաշտոնյաների շարքը, ովքեր, լինելով իշխանության մեջ և հայտնվելով տարատեսակ սկանդալային պատմությունների կիզակետում, այնուամենայնիվ հաջողել են դրանցից չոր դուրս գալ:

Այսօր կանդրադառնանք Լոռու նախկին մարզպետ Անդրեյ Ղուկասյանին: Ղուկասյանի հրաժարականի պատճառը մինչ օրս քննության առարկա չի դարձել իրավապահների կողմից, մի դեպքում, երբ այն ավելի քան լուրջ էր: Պատերազմից հետո համացանցում շրջանառվում էին լուսանկարներ և ներկայացվում են փաստեր, որոնք բաց տեքստով մեղադրում են Լոռու մարզպետ Անդրեյ Ղուկասյանին՝ ուղարկված օգնության յուրացման մեջ։ Իհարկե, Ղուկասյան Անդրեյի բախտը բերել է այնքանով, որ ինքը ոչ թե մինչիշխանափոխական, այլ հետհեղափոխական շրջանի ղեկավար է․ այսինքն՝ չի համարվում նախկին, ինչպիսին էր օրինակ` գեներալ Մանվել Գրիգորյանը, ում տարիների պայքարն ազերիների դեմ նույնիսկ հաշվի չառան, երբ դաշտ նետվեց տեղեկատվություն, թե նա զինվորներից «տուշոնկա է գողացել»:  Ավելին՝ Ղուկասյանը  ֆեյքերի ու յուրայինների միջոցով դաշտ էր նետել տեղեկություն, թե իբր Գերմանիայից ուղարկված ապրանքները գողացված են։ Բայց օգտատերը նրա այս արձագանքին էլ են պատասխանել և հրապարակել փաստաթղթեր, որոնք ապացուցում են, որ ոչ մի կտոր բեռ գողացված չէ, և ամեն ինչ օրինական ճանապարհով է արված: Չունենալով որևէ հակափաստարկ՝ Փաշինյանը որոշեց մի կողմ քաշել Ղուկասյանին, որպեսզի ստիպված չլինի հանրային ճնշման տակ վերջինիս դեմ քրեական գործ հարուցել:

Աղետի գոտում գեթ մեկ բնակարան չկառուցած իշխանությունների ներկայացուցիչները, մասնավորապես նույն Ղուկասյանը՝ ինքն իր համար ատամնաբուժարան էր կառուցում: Շինությունը կառուցում են իբրև ատամնաբուժարան, որը գտնվում է քաղաքի ամենից թանկարժեք տեղում՝ Վանաձորի Տիգրան Մեծի պողոտայի վրա։ Շինթույլտվությունը Ղուկասյանը ստացել է 2018թ․ հոկտեմբերին։ Նույն ամսվա 10-ին նշանակվել է մարզպետ, մինչ այդ եղել է մարզպետի տեղակալը։ Ի միջի այլոց, շինթույլտվության ժամկետը ավարտվել է, սակայն շինարարությունը դեռ ավարտված չէ, բայց լայն թափով իրականացվում է։ Շինարարությունը իրականացվում է, իր՝ մարզպետի, խորհրդական Ռուբեն Խանզադյանի (նկարում), կնոջ՝ Լիլիթ Նիազյանի անունով գրանցված «ՎանՌուբին» ՍՊԸ-ն։ Այդ նույն կազմակերպությունը վերջին 2,5 տարում, մարզպետարանի պատվերով կատարում է մեծաքանակ շինարարական, նաև ջեռուցման աշխատանքներ։ Պետբյուջեյի հաշվին, իհարկե։ Շինարարությունը, ինչպես հաղորդում են, բնակիչները, խանգարում է երեխաների խաղահրապարակին, հարակից շենքի բնակչությանը։ Իսկ երբ բնակիչները ուզեցել են իրենց բողոքը արտահայտել, հեգնական պատասխան են ստացել, թե դուք ո՞վ եք, որ մարզպետի դեմ դուրս գաք։