ՔՊ-ական պաշտոնյաներից ովքե՞ր են «ջրից չոր» դուրս եկել. մաս 9

Շարունակում ենք հանրության ուշադրությանը ներկայացնել իշխանական այն պաշտոնյաներին, որոնք հեղափոխությունից հետո հայտնվելով տարատեսակ սկանդալների կիզակետում , օգտվելով իշխանական լծակներից` հաջողացրել են ջրից չոր դուրս գալ:

Այսօր կանդրադառնանք Արարատի նախկին մարզպետ, ներկայումս Պետգույքի կառավարման կոմիտեի նախագահ Գարիկ Սարգսյանին:

Գարիկ Սարգսյանը, իրավամբ, Նոր Հայաստանի ամենասկանդալային պաշտոնյաներից մեկն է: Նախկին մարզպետի «մորքուրի հարսը» մարզպետարանի «դեմքն» է և ունի մի շարք արտոնություններ, ասենք՝ աշխատանքային օրերին կարող է մեկ շաբաթով գնալ Դիլիջան՝ «Դիլիջան Ռեզորթում» հանգստանալու, այնտեղից մտնել համացանց և նկարներ հրապարակել իր ընտանեկան երջանիկ պահերից ու այդ օրերի համար նույնպես աշխատավարձ ստանալ, դեռ մի բան էլ՝ պարգևավճար: Մյուս քրոջ ամուսինը՝ Կարապետ Հարությունյանը, Գարիկի ջանքերով նշանակվել է Արարատի մարզային ՃՈ պետ: Երիտասարդ մարզպետն աչքաթող չի արել նաև իր «բաջանաղին»՝ Արտավազդ Նազարեթյանին, ով մարզպետի կնոջ հորեղբոր փեսան է: Նա նշանակվել է փոխմարզպետ: Մարզպետի քեռորդին՝ Գևորգ Մանուկյանը, նույնպես տեղավորվել է մարզպետարանում` մարզպետի օգնականն է: Իսկ մյուս օգնականը՝ Տիգրան Շիրինյանը, Սարգսյանի ընկերն է: Ի դեպ, մորքուրի հարսը սկզբում այնքան էլ մորքուրի հարս չէր, քանի որ վարչապետի ներկայությամբ Սարգսյանը նրանից հրաժարվել էր, այնուհետև հաստատել, որ, այո, այդ կինը իրեն, այնուամենայնիվ, բարեկամ է: 

Մարզպետ աշխատելու տարիներին Սարգսյանն իրեն մեկ րոպե ուշ պատասխանելու համար աշխատանքից ազատել էր աշխատակազմի ղեկավարին, դա էլ դեռ բավական չէր, ընդամենը, օրեր առաջ էլ մարզպետը հայտնվեց ևս մեկ սկանդալային պատմության կիզակետում. Գարիկ Սարգսյանի վարորդը մի քանի այլ երիտասարդների հետ գնացել ու պարզաբանում է պահանջել վարսավիրից, ով չի կարողացել մարզպետին արտահերթ սպասարկել և այդ ամենը հանգեցրել է նրան, որ վերոնշյալ անձինք վարսավիրին ծեծի են ենթարկել:

Գարիկ Սարգսյանի բազմաթիվ կարգադրություններ դատարանով անվավեր են ճանաչվել, սակայն պաշտոնյան օրենքը փաստացի խախտելու համար որևէ պատասխանատվության չի ենթարկվել: