Ի պատասխան հակաիսլամական ֆիլմի` Քաբուլում պայթյունի հետևանքով զոհվել է առնվազն 10 մարդ

Առնվազն 10 մարդ զոհվել է այսօր առավոտյան Քաբուլում տեղի ունեցած պայթյունի հետևանքով: Ըստ Agence France-Presse-ի (որն իր հերթին վկայակոչում է տեղական իշխանություններին)`զոհերից ինը օտարերկրացիներ են։ Բացի այդ` վիրավորվել է երկու աֆղանցի ոստիկան։

Մահապարտը պայթյունն իրականացրել է Քաբուլի օդանավակայան տանող ճանապարհի վրա` օտարերկրացիներին տեղափոխող միկրոավտոբուսի մոտ։

Ինպես նշվում է, զոհված օտարերկրացիները մասնավոր ընկերության աշխատակիցներ են եղել, որոնք աշխատում էին Քաբուլի օդանավակայանում։ Թե որ երկրի քաղաքացիներ էին զոհվածները, չի նշվում։

Reuters-ը հաղորդում է, որ պայթյունի համար պատասխանատվությունն իր վրա է վերցրել «Հեզբ-է-իսլամ» խմբավորումը, և որ ահաբեկչությունն իրականացվել է ի պատասխան հակաիսլամական ֆիլմի։ խմբավորման ներկայացուցիչը հայտնել է, որ ռումբը պայթեցնողը կին է եղել։