ՔՊ-ական պաշտոնյաներից ովքե՞ր են «ջրից չոր» դուրս եկել. մաս 11

Շարունակելով ընթերցողների ուշադրությանը ներկայացնել ՔՊ-ական այն պաշտոնյաներին, ովքեր հայտնվել են տարատեսակ սկանդալների և ոչ միանշնակ պատմությունների մեջ՝ այսօր մեր ուշադրության կենտրոնում կպահենք Արմավիրի քաղաքապետ Դավիթ Խուդաթյանին:

Նախորդ տարի մամուլում տեղեկություններ էին տարածվել, որ նախատեսված է կազմակերպվել Արմավիր ՋՕԸ-ի ջրօգտագործողների ընկերության ներկայացուցիչների ընդհանուր ժողովը, որի արդյունքում այս ընկերությունը կվերակազմավորվի, ավելի ճշգրիտ՝ կբաժանվի երկու ՋՕԸ-ների` Մերձափնյա և Արմավիր ՋՕԸ: Այս ՋՕԸ-ները առանձին էին մինչև 2017 թվականը: Խնդիրը ոչ թե ՋՕԸ-ի վերակազմավորումն էր, այլ այն, որ դեռևս որոշումը չկայացած, արդեն հայտնվել են ՋՕԸ-ի ղեկավարի հավակնորդներ և հովանավորներ: Արմավիրի քաղաքապետ Դավիթ Խուդաթյանը այս պաշտոնի համար լոբբինգ է անում իր մերձավոր Սիրաք Սարգսյանի համար: Մի դեպքում, երբ Նոր Հայաստանում բոլորին փորձում են համոզել, որ ԽԾԲ-ն այլևս անցյալում է:

Արմավիրի քաղաքապետի հետ կապված ոչ պակաս ուշագրավ է վերջինիս հայտարարագիրը: Դիցուք՝ պաշտոնը ստանձնելու պահին, այսինքն՝ 2018 թվականին, Խուդաթյանը որպես եկամուտ հայտարարագրել էր OPEL ASTRA CABRIO 1.8I ավտոմեքենան և 4,000,000.00 ՀՀ դրամ: 2020 թվականին քաղաքապետը հայտարարագրել է՝ բնակարան քանաքեռ-զեյթուն վարչական շրջանում, որը ձեռք է բերվել 2019 թվականին, 13,500.00 ԱՄՆ դոլարով գնված հողամաս, որը ձեռք է բերվել 2019 թվականին, TOYOTA մակնիշի ավտոմեքենա՝ ձեռք բերված 2019 թվականին, KIA FORTE 1.6 և OPEL ASTRA 1.4՝ ձեռք բերված 2019 թվականին, 22,000,000.00 ՀՀ դրամի փոխառություն, 3,000,000.00 կանխիկ դրամ և ինչը ամենակարևորն է՝ նշված չեն քաղաքապետի եկամուտի աղբյուները, առնվազն՝ աշխատավարձը: Եվ այս ամենը չի կարող որոշակի կասկածներ չառաջացնել հանրության շրջանում, սակայն, ինչպես երևում է՝ կասկածները առաջանում են միայն շարքային քաղաքացիների մոտ, իսկ պատկան մարմինների համար ամեն ինչ կարգին է: