Մոսկվան կօգնի Երևանին ու Բաքվին սահմանի կարգավորման հարցում` երկու կողմերի խնդրանքի դեպքում

Ռուսաստանը օգնություն կցուցաբերի Հայաստանին և Ադրբեջանին` սահմանին առկա լարվածության կարգավորման հարցում, եթե նման խնդրանքով հանդես գան երկու պետություններն էլ: Այս մասին լրագրողներին հայտարարել է Ռուսաստանի Դաշնության արտաքին գործերի փոխնախարար Անդրեյ Ռուդենկոն, հայտնում է ՏԱՍՍ-ը:

«Սա նորմալ իրավիճակ է, երբ նման իրադրությունում գտնվող կողմերը դիմում են մեզ` օգնության, աջակցության, միջնորդության խնդրանքով, մանավանդ որ մենք փորձ ունենք նոյեմբերի 9-ին և հունվարի 11-ին հայտարարություն մշակելու համատեքստում: Հետևաբար, եթե նման կոչով հանդես գան բոլոր մասնակիցները, և ոչ միայն կողմերից որևէ մեկը, նկատի ունեմ Ադրբեջանից և Հայաստանից, մենք պատրաստ կլինենք տրամադրել այն օժանդակությունը, որը կարող ենք», - ասել է նա:

Ռուդենկոն հայտնել է, որ Հավաքական անվտանգության պայմանագրի կազմակերպության (ՀԱՊԿ) անդամ պետությունների արտգործնախարարները մայիսի 19-ին Դուշանբեում կքննարկեն հայ-ադրբեջանական սահմանին տիրող լարվածությունը: «Արտաքին գործերի նախարարները հավաքվում են Դուշանբեում` քննարկելու օրակարգի բոլոր հարցերը: Չեմ բացառում, որ այդ հարցը այնտեղ քննարկվի: Կարծում եմ, որ հիմնական քննարկումը տեղի կունենա Դուշանբեում՝ նախարարների հանդիպման շրջանակներում»: