Հայաստանին իսլամիստական ահաբեկչություններ չեն սպառնում

Անցած շաբաթ օրը ՀՀ ոստիկանության Երևանի կենտրոնի բաժնում աննախադեպ մեծ հավաք էր: Տարօրինակն այն էր, որ բաժնին հարող տարածքներում կային նաև կինոլոգներ՝ իրենց հատուկ վարժեցված շների հետ: Այդ շներին սովորաբար օգտագործում են այն ժամանակ, երբ հաղորդում է ստացվում այս կամ այն հաստատությունում տեղադրված ռումբի մասին: Այս մասին գրել էր «Հայկական ժամանակ» օրաթերթը։ Իսկ թե ինչու են այսպիսի մեծ հավաք անցկացնում, թերթի հարցմանն ի պատասխան` Աշոտ Ահարոնյանն ասել է, որ դրանք կանխարգելիչ միջոցառումներ են։

Ավելի ուշ թերթին պարզ են դարձել որոշ մանրամասներ։ «ՀԺ»-ի ունեցած տեղեկություններով` ԱՄՆ-ի զգուշացումները Հայաստանում իսլամիստների կողմից ահաբեկչական գործողությունների հավանականության մասին անհիմն չեն: Այն տեղեկությանը, որի հիման վրա ԱՄՆ-ն հայտարարություն է արել, տիրապետում են նաև մեր իրավապահները: Ըստ «ՀԺ» ունեցած տեղեկությունների`իրավապահները զգուշացրել են մեծ ձեռնարկությունների, առևտրի կետերի, պետական հիմնակությունների ղեկավարներին, որպեսզի նրանք անմիջապես տեղեկացնեն նկատված տարօրինակ իրերի մասին: Առաջին ահազանգը եղել է կիրակի առավոտյան՝ երկու կասկածելի փաթեթ են գտել Աբովյան փողոցի «ՍԱՍ» սուպերմարկետում: Համապատասխան ստորաբաժանումներն արագ արձագանքել են ահազանգին, բայց պարզվել է, որ փաթեթների մեջ կենցաղային իրեր են:

Այս տեղեկությունը ճշտելու համար Լուրեր.com–ը զրուցեց Ոստիկանության հասարակայնության հետ կապերի բաժնի աշխատակցի հետ, ով նշեց, որ եթե վարչության պետը տեղեկություն տվել, մեկնաբանել է, ուրեմն դա պաշտոնական է։

Լրագրողի այն դիտարկմանը, որ խոսքը վերաբերում է այն տեղեկությանը, թե Հայաստանում իսլամիստների կողմից ահաբեկչական գործողությունների հավանականության մասին լուրերն անհիմն չեն, ոստիկանության աշխատակիցն ասաց. «Թե իրենց տեղեկությունը ինչի մասին է, մենք տեղյակ չենք։ Ոստիկանությունն իր առօրյա աշխատանքն է կատարում։ Դա պրոֆիլակտիկ բնույթ է կրում։ Ահաբեկչության մասին լուրեր մենք չունենք։ Մենք կատարում ենք մեր կանխարգելիչ, պրոֆիլակտիկ աշխատանքները»։