ՔՊ-ական պաշտոնյաներից ովքե՞ր են «ջրից չոր» դուրս եկել. մաս 15

Արաբկիր վարչական շրջանի ղեկավարի անվան հետ կապված սկանդալներն սկսեցին դեռևս 2019 թվականին: Թաղապետարանում ոչ ավել, ոչ պակաս իսկական բունտ էր հասունացել: Բողոքի պատճառն այն էր, որ աշխատակիցների խոսքով, իրենք ստացել էին 15-20 տոկոս եռամսյակային պարգեւավճար, մինչդեռ թաղապետ Արամ Դանիելյանը պարգեւատրվել է աշխատավարձի 150 տոկոսի չափով:

Աշխատակիցների խոսքով՝ թաղապետն անտեղի նկատողություններ է անում, աշխատանքի է տեղավորել իր ընկեր-բարեկամներին: Դեռ 2019 թվականին մամուլում մի շարք հրապարակումներ եղան, որոնցում նշվում էր, որ Արաբկիր վարչական շրջանի ղեկավար Արամ Դանիելյանը «խնամի-ծանոթ-բարեկամ» սկզբունքով թաղապետարան է բերել իր բարեկամներին ու ընկերներին, որոնք զբաղեցնում են տարբեր պաշտոններ՝ սկսած տեղակալից մինչև վարորդ։ Լրատվամիջոցներից մեկի հետ զրույցում թաղապետարանի աշխատակիցը նշել էր, որ Դանիելյանի բարեկամներից որևէ մեկը տեղակալ չի աշխատում, միայն թաղապետի վարորդն է, որ հանդիսանում է Դանիելյանի կնոջ եղբայրը։ Դանիելյանի վարորդը այնուհետև աշխատանքի է անցել Արաբկիր վարչական շրջանի Առևտրի, սպասարկումների և գովազդի բաժնում։ Արաբկիր վարչական շրջանի կանաչապատման բաժնի պետ Հովսեփ Հովսեփյանն էլ Արամ Դանիելյանի քեռու որդին է։ Ինքը` թաղապետը, սա հերքում է` հայտարարելով, որ բարեկամ գուցե և լինի, սակայն քեռու որդին չէ: Սակայն, ինչ տարբերություն, չէ՞ որ ԽԾԲ-ն ամեն դեպքում գործում է:

Երեւանի ավագանու նախորդ տարվա նիստերից մեկում «Լույս» խմբակցության ավագանու անդամ Անի Խաչատրյանը հարցուպատասխանի ժամանակ վեճի բռնվեց Արամ Դանիելյան հետ: Նախքան հարցին անցնելը Անի Խաչատրյանը հայտնեց, որ ընդամենը երկու օր առաջ իր աշխատասենյակ բողոքելու էին գնացել Արամ Դանիելյանի աշխատակիցները: «Դուք ձեր աշխատավարձը համեմատել եք ձեր խոհարարի աշխատավարձի հետ: Էլ չասեմ, որ մեկ այլ առիթով էլ թեփեր եք անվանել ձեր աշխատակիցներին։ Նրանց հաստիքները կրճատվել են»,- ասաց Անի Խաչատրյանը: Ըստ էության, թաղապետը չկարողացավ հերքել, որ իր ենթակաների հետ շփման ձևը անչափ հեռու է գործնական էթիկայի կանոններին համապատասխանելուց: