ՔՊ-ական պաշտոնյաներից ովքե՞ր են «ջրից չոր» դուրս եկել. մաս 16

Պատերազմից հետո անրադարձել էինք Տավուշի այն ժամանակվա մարզպետ Հայկ Չոբանյանի աղմկահարույց գրառմանը, որում նա «կեղծ, անբարոյական և հանցագործ» էր անվանել այն մարդկանց, որոնց տեղեկությունների համաձայն՝ Տավուշի մարզում ընթացել են  չափագրման աշխատանքներ՝ խորհրդային շրջանում ադրբեջանաբնակ որոշ գյուղեր և հարակից տարածքներ Ադրբեջանին հանձնելու նպատակով: Իր այդ պիտակավորումների համար նախկին մարզպետ, այսօր արդեն նախարար Չոբանյանը որևէ պատասխանատվության, անգամ՝ ամոթանքի այդպես էլ չէր արժանացել:

Ընդամենը ամիսներ առաջ Տավուշի մարզպետ Հայկ Չոբանյանը վստահեցնում էր հանրությանը և վարչապետ Փաշինյանին, որ Իջևանում գործող անտառային մաֆիային գտնելը ընդամենը ամիսների գործ է, հատկապես, որ, ըստ մարզպետի ակնարկների, գիտեն, թե ովքեր են կանգնած այդ մաֆիայի հետևում: Անցան ամիսներ, սակայն այս հարցում դեռևս ոչ մի տեղաշարժ չկա, ավելին՝ գյուղացիներին չեն թողնում մտնել անտառ, մինչդեռ անտառը շարունակվում է թալանվել, ընդամենը շաբաթներ առաջ հայտնի էր դարձել, որ անհայտ անձինք կրկին ֆուռերով փայտ են դուրս բերում իջևանյան անտառներից: Ներկա իշխանությունների տրամաբանությունը այն է, որ նախկինները համագործակցել են այդ անտառային մաֆիայի ներկայացուցիչների հետ, վերջիններս էլ համապատասխան շնորհակալությունն են հայտնել` աջակցելով, ասենք, ընտրությունների ժամանակ:

Հիմա իրավիճակը փոխվել է և անչափ տրամաբանական կլիներ, որ այսօր մենք ականատես լինեինք աղմկահարույց բացահայտումների, ոչ թե անտառների շարունակական ոչնչացմանը: Եթե նոր իշխանությունները հների պես չեն ցանկանում նստել վերոնշյալ մաֆիայի պոչին (եթե այն ընդհանրապես կա, իհարկե), ապա ո՞վ կարող է երաշխավորել, որ այսօր էլ չի գործում նախկինում արմատացած մշակույթը: Սակայն, պատժվողներ ինչպես չեն եղել, այդպես էլ չեն լինում...