Նիկոլ Փաշինյանի վերջնաժամկետը լրացավ. ի՞նչ ունենք վեց ամիս անց

Նոյեմբերին Նիկոլ Փաշինյանը հանրությունից վեց ամիս ժամանակ էր խնդրել և ներկայացրել ճանապարհային քարտեզ, որը և պատրաստվում էր այդ վեց ամիսների ընթացքում իրագործել: Այդ ճանապարհային քարտեզը հետևյալ կետերն էր պարունակում:

1.Ղարաբաղի հարցի բանակցային գործընթացի վերականգնում ԵԱՀԿ ՄԽ համանախագահության ձեւաչափով՝ Արցախի կարգավիճակի եւ իրենց բնակության վայրեր արցախցիների վերադարձի հարցի առաջնահերթության ընգծմամբ:

2. Ապահովել արցախցիների վերադարձը իրենց հայրենի օջախներ: Ամբողջությամբ վերականգնել Արցախի բնականոն կյանքը: ԼՂ իշխանությունների վերահսկողության տակ գտնվող տարածքների վնասված տների, բնակարանների եւ ենթակառուցվածքների վերականգնում:

3. Զոհված զինծառայողների եւ քաղաքացիների ընտանիքների սոցիալական երաշխիքների ապահովում:

4. Պատերազմական գործողությունների ընթացքում Հայաստանի Հանրապետության տարածքում տուժած բնակելի եւ հանրային կառույցների եւ ենթակառուցվածքների վերականգնում:

5. Հաշմանդամություն ստացած զինծառայողների սոցիալական երաշխիքների, պրոթեզավորման գործընթացի եւ մասնագիտական վերապատրաստման ապահովում:

6. Գերեվարված զինվորականների եւ քաղաքացիական անձանց շուտափույթ վերադարձ: Նրանց ընտանիքների սոցիալական երաշխիքների ապահովում: Անհետ կորածների ճակատագրերի շուտափույթ պարզաբանում: Նրանց ընտանիքների սոցիալական երաշխիքների ապահովում:

7. Պատերազմին մասնակցած անձանց եւ ընդհանուր առմամբ հանրության հոգեբանական ռեաբիլիտացիայի համակարգի ձեւավորում:

8. Զինված ուժերի բարեփոխումների ծրագրի հաստատում եւ բարեփոխումների մեկնարկ:

9. Կորոնավիրուսի համավարակի հաղթահարում եւ դրա հետեւանքների վերացում:

10. Տնտեսական ակտիվության միջավայրի վերականգնում:

11. Ժողովրդագրական խնդիրների լուծման ծրագրերի ակտիվացում:

12. Ընտրական օրենսգրքի փոփոխությունների եւ կուսակցությունների մասին նոր օրենքի ընդունում:

13. Մասնագիտացված դատավորների ինստիտուտի ներդրում՝ որպես հակակոռուպցիոն դատարանի ստեղծման առաջին քայլ: Ապօրինի գույքի բռնագանձման օրենքի կիրարկման մեկնարկ:

14. Հայաստանյան քաղաքական և քաղաքացիական համայնքի ներկայացուցիչների հետ մշտական թեմատիկ կոնսուլտացիաների անցկացում:

15. Սփյուռքի հայկական կառույցների և առանձին անհատների հետ մշտական թեմատիկ կոնսուլտացիաների անցկացում: Հայաստանյան և սփյուռքի առանձին անհատների և կառույցների ներգրավում վերոնշյալ գործընթացների մեջ:

Նիկոլ Փաշինյանի՝ ժողովրդից խնդրած վեց ամիսներն անցել են: Վերը նշված կետերից և ոչ մեկը չի իրագործվել: Թերևս միայն՝ մասնագիտացված դատավորների ինստիտուտն է ներդրվել, այն էլ միայն այն պատճառով, որ դա անհրաժեշտ էր Փաշինյանին՝ դատական համակարգի ողնաշարը վերջնականապես կոտրելու համար: Ո՞ւր են ԶՈՒ բարեփոխումները: Ու՞ր է բանակցային գործընթացի վերականգնումը, ո՞ւր են վերադարձած գերիները: Նիկոլ Փաշինյանը հերթական անգամ ստել է ժողովրդին և հերթական անգամ ժամանակ շահել՝ Հայաստանին նորանոր հարվածներ հասցնելու համար: Այս գեղեցիկ բաժակաճառ հիշեցնող քարտեզի փոխարեն Նիկոլ Փաշինյանը վեց ամսյա ժամկետը լրանալուն պես ստորագրում է մեկ այլ, ոչ պակաս խայտառակ փաստաթուղթ` այս անգամ արդեն ադրբեջանցիներին նվիրելով ՀՀ սուվերեն տարածքի մի մասը: