Ցուցահանդես՝ նվիրված Հմայակ Հակոբյանի ծննդյան 140-ամյակին

Դեկտեմբերի 9-ին Հայաստանի ազգային պատկերասրահում բացվեց 19-րդ դարի վերջի և 20-րդ դարասկզբի հայ ռեալիստական արվեստի նշանավոր դեմքերից մեկի՝ Հմայակ Հակոբյանի (1871, Տրապիզոն - 1939, Թիֆլիս) ցուցահանդեսը, ում ստեղծագործական հարուստ ժառանգությունը տակավին ուսումնասիրված չէ։ Այդ բացը լրացնելուն է ուղղված ներկա ցուցահանդեսը։ Նկարչի շուրջ 2850 աշխատանք (գեղանկար, գծանկար, էսքիզ) պահպանվում են ՀԱՊ-ի ֆոնդերում և այսօր դրանցից 92-ը՝ գեղանկար և գծանկար, ներկայացվում են հանրության ուշադրությանը: Նկարիչը մասնագիտական կրթություն է ստացել Մյունխենի գեղարվեստի ակադեմիայում (1891-1894), ապրել ու ստեղծագործել Թիֆլիսում, ճամփորդել Շվեյցարիայում ու բազմիցս այցելել Հայաստան։ 1889 թվականից գեղանկարչական ու գրաֆիկական աշխատանքներով մասնակցել է Թիֆլիսում ու Երևանում կազմակերպված ցուցահանդեսներին։

Նրա նախասիրությունները դրսևորվել են կերպարվեստի բոլոր ժանրերում։ Նկարել է Թիֆլիսի բազմազգ բնակչության կյանքին ու կենցաղին նվիրված թեմատիկ ու ժանրային հորինվածքներ, ազգային ու անհատական բնութագրումով առանձնացող իր մտերիմ մարդկանց և տարբեր ազգերի ներկայացուցիչների դիմանկարներ, էտյուդային բնույթի գողտրիկ բնանկարներ ու դասական հորինվածքով նատյուրմորտներ, նոր թեմաներով ու ժանրերով, գեղավեստական արտահայտչամիջոցներով հարստացրել հայ արվեստը։