Վահան Քերոբյանի՝ պոպուլիզմի մաստեր-կլասը

Էկոնոմիկայի նախարար Վահան Քերոբյանը հերթական անգամ պոպուլիզմի մաստեր-կլաս է տալիս: Այս անգամ էլ վերջինս որոշել է ավետել հանրությանը, որ տնտեսությունը ակտիվ տեմպերով զարգանում է, շինարարությունը և գյուղատնտեսությունը բուռն աճ են արձանագրել, իսկ ներդրումներն ընդհանրապես հորդում են: Շինարարության մասով գուցե հնարավոր լինի համաձայնվել` հաշվի առնելով,  թե ինչ տեմպերով են Հայաստանում նախընտրական ասֆալտապատման աշխատանքներ տարվում, սակայն հետաքրքիր է, թե այդ ինչպես է ծաղկում գյուղատնտեսությունը մի իշխանությունների օրոք, որոնք անգամ գյուղատնտեսության նախարարություն պահելու իմաստ և նպատակ չգտան: 

Ինչ վերաբերվում է հորդացող ներդրումներին, ապա սա ոչ այլ ինչ է, քան դասական նախընտրական պոպուլիզմ. Վահան Քերոբյանը պաշտոնը ստանձնելու առաջին իսկ օրվանից հանրությանը կերակրում է սահմանին հերթ կանգնած պոտենցիալ ներդրողների մասին գեղեցիկ հեքիաթներով` առանց դրանց առկայության որևէ փաստացի ապացույցի: Դժվար թե հետպատերազմյան Հայաստանում, որի տնտեսությունը գտնվում է, մեղմ ասած, ողբալի վիճակում, ներդրողներն այդքան պատրաստակամ լինեին հորդացող ինվեստիցիաներ կատարել:

Ինչպես հասկանում ենք՝ Վահան Քերոբյանի մոտ նախընտրական քարոզարշավն արդեն իսկ ամբողջ թափով ընթացքի մեջ է...