ՔՊ-ի գործարար պաշտոնյաները. մաս 8

Շարունակում ենք ընթերցողի ուշադրությանը ներկայացնել ՔՊ-ական այն պաշտոնյաներին, որոնք այս կամ այն չափով ներգրավված են եղել բիզնես գործունեության մեջ:

Գյումրիում համառ լուրեր են շրջանառվում, թե ԱԱԾ-ի՝ Յուրա Մովսիսյանի ազգակցուհուն «ձերբակալել-ազատ արձակել» օպերացիայի հետևում «Իմ քայլը» խմբակցության պատգամավոր Կարեն Սարուխանյանն է կանգնած։ Բանն այն, է որ Գյումրիում գործող սոցիալական բոլոր կառույցներն ապրիլի 1-ից միավորելու են։ Այն գործելու է՝ «մեկ պատուհան» սկզբունքով, սոցիալական աջակցության տարածքային բաժիններն արդեն իսկ լուծարել են՝ վերամիավորելու նպատակով։

Պատգամավորը, ըստ այդ լուրերի, ցանկանում է տնօրեն կարգել իր հորեղբոր որդուն՝ Արմեն Սարուխանյանին, որը երկար տարիներ աշխատել է Գյումրու ծերանոցի փոխտնօրեն, զբաղեցրել է Գյումրու սոցիալական տարածքային բաժիններից մեկի պատասխանատուի պաշտոնը։ Այժմ էլ, ըստ լուրերի, պատգամավորը փորձում է ճանապարհից վերացնել այն բոլոր մարդկանց, որոնք կարող են նորաստեղծ կառույցի հավանական տնօրեն լինել։

Կարեն Սարուխանյանն անասնաֆերմա ունի Արփի Լիճ ազգային պարկից ոչ հեռու, իսկ ազգային պարկը շատ հարմար արոտավայր ու խոտհարք է հանդիսանում ամբողջ տարածաշրջանի համար: Ի դեպ, նշենք, որ Սարուխանյանի ֆերմայի անասնագլխաքանակը 7-8 անգամ աճել է հեղափոխությունից ի վեր: Հունիսի 5-ին ազգային պարկի ֆեյսբուքյան էջում լուսանկարներ հայտնվեցին, որոնցից մեկում մեզ արդեն հայտնի Մուշեղ Մուրադյանը պատվոգիր է հանձնում Արփի համայնքի ղեկավար Մերկել Ղարիբյանի՝ հավանաբար ազգային պարկի տարածքում գտնվող Արդենիսի լիճը սեփական անասնաֆերմայի կոյուղատար սարքելու ու կործանելու համար, որտեղ բազմաթիվ էնդեմիկ կենդանիներ են ապրել: