Ջանջուղազյանն ու Յոլյանը «վառեցին» Նիկոլ Փաշինյանին

Նիկոլ Փաշինյանի երկու թիմակիցներ՝ հաշվեքննիչ պալատի նախագահը և ֆինանսների նախարարը այսօր, ըստ էության, հերքեցին վարչապետի պաշտոնակատարի հատընտիր միֆերը, որոնցով վերջինս սիրում է կերակրել հանրությանը: Դիցուք՝ հաշվեքննիչ պալատի նախագահ Յոլյանը հայտարարեց, որ պետական գնումների ոլորտում առկա է կոռուպցիոն ռիսկ, քանի որ 40 տոկոսը այդ գնւմների կատարվել է մեկ անձից: Հիշեցնենք, որ Նիկոլ Փաշինյանը նախ հերքում էր այդ հանգամանքը, այնուհետև հայտարարում, որ որևէ կոռուպցիոն ռիսկ այստեղ չկա:

Պետական բյուջեի գումարները արդյունավետ ծախսելու միֆը նույնպես ցրվեց, քանի որ պալատի նախագահի կողմից ներկայացված տվյալների համաձայն՝ ծրագրային ֆինանսավորմամբ կատարված միջոցառումների 17.7 տոկոսի մոտ որևէ արդյունքային ցուցանիշ չկա: Պետական համակարգի գրեթե կեսում էլ աուդիտ չի անցկացվել:

Փաշինյանի միֆերը կոտրելով էր զբաղված այսօր նաև ֆինանսների նախարար Ատոմ Ջանջուղազյանը: Ըստ նրա՝ Հայաստանում 2020թ. տնտեսական աճի կանխատեսումները վերանայվել են նվազման ուղղությամբ։ 2020թ. կանխատեսվում էր անկում 7,9 տոկոսի մակարդակով, բայց փաստացի այն կազմել է 7,6 տոկոս։ Մինչդեռ Նիկոլ Փաշինյանը ավետում էր ոչ միայն տնտեսության աճ, այլ անգամ՝ երկնիշ աճ: Ինչպես տեսնում ենք՝ ֆիննախում նրա հետ այնքան էլ համաձայն չեն, կամ գուցե այս գերատեսչության աշխատանքի հիմքում թվերն են և փաստերը, այլ ոչ թե քաղաքական դիվիդենտներ շահելուն ուղղված պարզագույն պոպուլիզմը...