«ՀԺ». Նիկոլ Փաշինյանը՝ ԱԺ էթիկայի հանձնաժողովի նախագահ

ԱԺ կանոնակարգ-օրենքով սահմանված կարգով՝ Հայ ազգային կոնգրեսի պատգամավոր Նիկոլ Փաշինյանը դարձել է ԱԺ էթիկայի հանձնաժողովի նախագահ: Այս մասին «Հայկական ժամանակ»-ը երեկ տեղեկացել է խորհրդարանի պաշտոնական կայքից: ԱԺ նախագահ Հովիկ Աբրահամյանը էթիկայի հանձնաժողովի կազմը հաստատելու մասին կարգադրությունը ստորագրել է սեպտեմբերի 14-ին:

«ՀԺ»-ի թղթակցի հարցին՝ որո՞նք են լինելու այն առաջին երեք հարցերը, որ բարձրացվելու է էթիկայի հանձնաժողովում, Փաշինյանը պատասխանեց. «Սեպտեմբերի 24-ին նիստ է նշանակված, որտեղ, նախ, քննարկվելու է օրինակելի դիմումի ձևեր մշակելու հարցը, որպեսզի քաղաքացիները հնարավորինս հեշտ և ամբողջական դիմումներ գրեն Էթիկայի հանձնաժողովին, և երկրորդը՝ մենք ունենք քաղաքացի Վարդգես Գասպարիի դիմումը, հանձնաժողովը սեպտեմբերի 24-ի նիստում պետք է որոշում կայացնի Վարդգես Գասպարիի դիմումի քննությունը սկսելու կամ դիմումի քննությունը մերժելու մասին»:

Թերթը հիշեցնում է, Գասպարին սույն հանձնաժողովին է դիմել ԱԺ-ի մոտ իր հետ տեղի ունեցած միջադեպից հետո, երբ ԱԺ պատգամավոր Սամվել Ալեքսանյանը նրա ձեռքից խլել էր բողոքի պաստառը, իսկ Առաքել Մովսիսյանի թիկնապահը հրել և գցել էր նրան: