Միլիոնավոր դրամների գնումներ՝ մեկ անձից. Գարիկ Սարգսյանի ճոխությունները նոր պաշտոնում

Գարիկ Սարգսյանի ղեկավարած պետական գույքի կառավարման կոմիտեն մի շարք ուշագրավ գնումներ է կատարել 2021 թվականի ընթացքում:

Ընդ որում, ուշագրավն այն է, որ այդ գնումների մեծ մասը մեկ անձից էին: Դիցուք՝ 131,950 դրամի տնտեսական ապրանքներ են ձեռք բերվել «ՍՈՎԹ ՊԱՊԻՐՈՒՍ» ՍՊԸ-ից: 191,500 դրամի անիվներ և մարտկոցներ` «ԱՎՏՈԲԱՏ ՍՊԸ»-ից: 500,000 դրամի ավտոմեքենաների վերանորոգման ծառայություն է ձեռք բերվել «ԱՊԱՐԱՆՍԵՐՎԻՍ» ՍՊԸ-ից: 64,600 դրամի դիմակ՝ «ԲԻԳ ՊԼԱՍՏ» ՍՊԸ-ից: 858,620 դրամ է տրվել «Դարեսկիզբ» ՍՊԸ-ին` թերթերով գովազդի տեղադրման համար: 1,152,000 դրամի փաստաթղթերի կառավարման համակարգչային ծրագրային փաթեթների սպասարկման ծառայություններ են ձեռք բերվել «ՎԻ ԻՔՍ ՍՈՖԹ» ՍՊԸ-ից: 10,361,400 դրամի ոչ բնակելի անշարժ գույքի վարձակալություն՝ «Հանարդնախագիծ» ԲԲԸ-ից;

«Սոֆթ Պապիրուս» ՍՊԸ-ն, որի հիմնադիրն ու տնօրենը Տիգրան Կարապետյանն է՝ դեռ 2019-ին էր կառավարությունից որոշակի տնտեսական արտոնություններ ստացել: Ավտոբատ ՍՊԸ-ի անունը հանդիպում ենք ՊԵԿ 2020 թվականի տարածած հայտարարության մեջ, որտեղ, մասնավորապես, նշվում է, որ «Ավտոբատ» ընկերությունը առանց ուղեկցող փաստաթղթերի ապրանքները մատակարարել կամ տեղափոխել է՝  չկատարելով 424 հազար դրամի հարկային պարտավորությունները: Դարեսկիզբ ՍՊԸ-ն՝ նույն Հայկական ժամանակն է, ասել է թե՝ Նիկոլ Փաշինյանի ընտանիքին պատկանող մեդիան, որին Գարիկ Սարգսյանի հիմնարկը շուրջ 900 հազար դրամ է փոխանցել: «Հանարդնախագիծ» ԲԲԸ-ն իր հերթին կապվում է բնապահպանության նախկին նախարար՝ Բուլկի Արամի՝ Արամ Հարությունյանի անվան հետ: «Հանարդնախագիծ» ԲԲԸ-ի տնօրենն է Արայիկ Խաչիկի Հարությունյանը, ով ծնվել է Կոտայքի մարզի Եղվարդ քաղաքում: Նշենք, որ Արամ Հարությունյանը նույնպես Եղվարդից է: