ՏԻՄ ընտրություններ են անցկացվելու հանրապետության հինգ մարզերի 318 համայնքներում

Այսօր Հայաստանի Հանրապետության կենտրոնական ընտրական հանձնաժողովի նախագահ Տիգրան Մուկուչյանը լրագրողների հետ հանդիպման ժամանակ ներկայացրել է վիճակագրական տվյալներ 2012թ. սեպտեմբերի 23-ի տեղական ինքնակառավարման մարմինների ընտրությունների վերաբերյալ:

Սեպտեմբերի 23-ին ՏԻՄ ընտրություններ են անցկացվելու հանրապետության հինգ մարզերի՝ Արագածոտնի, Կոտայքի, Գեղարքունիքի, Վայոց Ձորի, Տավուշի 318 համայնքներում: 

«Համայնքի ղեկավարի ընտրություններին մասնակցելու համար առաջադրվել է 699 թեկնածու, ինքնաբացարկ է հայտնել 177-ը. այժմ համայնքի ղեկավարի թեկնածուները 521-ն են: Առաջադրումներից մերժվել է 1 թեկնածուի դիմում, քանի որ առաջադրվողը զինծառայող է եղել:

Ավագանու ղեկավարի ընտրություններում առաջադրվել է 2730 թեկնածու, ինքնաբացարկ է հայտնել 103-ը, այժմ՝ ավագանու անդամի թեկնածուները 2626-ն են: Մերժվել է առաջադրման երկու դիմում. մեկը՝ եղել է զինծառայող, մյուսի տարիքը չի համապատասխանել առաջադրման կարգին»:

Տիգրան Մուկուչյանի փոխանցմամբ համայնքի ղեկավարի գրանցված թեկնածուներից 11-ն իգական սեռի ներկայացուցիչներ են, իսկ ավագանու անդամի գրանցված թեկնածուներից իգական սեռի ներկայացուցիչներ են 164-ը:

«Սեպտեմբերի 23-ի ընտրություններին գործելու է 535 տեղամաս: Ընտրություններին դիտորդական առաքելություն են իրականացնելու 15 տեղական կազմակերպություններ, 20 միջազգային դիտորդներ: Քվեաթերթիկներն արդեն տպագրված են, և վաղը ԸԸՀ-ների միջոցով դրանք կառաքվեն ընտրատարածքներ»: