ՔՊ նախընտրական ցուցակի ուշագրավ դեմքերը. Հարություն Գուլյան

Շարունակում ենք ընթերցողի ուշադրությանը ներկայացնել ՔՊ նախընտրական ցուցակում տեղ գտած ուշագրավ անձանց և վերջիններիս հետ կապված հետաքրքրաշարժ պատմությունները:

Հաջորդը կանդրադառնանք Հարություն Գուլյանին, ով հեղափոխությունից հետո աշխատել է որպես Ջրային կոմիտեի նախագահի տեղակալ, այնուհետև Արագածոտնի մարզպետի տեղակալ:

Առաջին պաշտոնում Գուլյանից բողոքում էին Արմավիրի մարզի բնակիչները:  Արմավիրցիները պնդում էին` Ջրային կոմիտեի նախագահի տեղակալ Հարություն Գուլյանի պատճառով ոռոգման ջուրը իրենց չէր հասնում, արդյունքում՝ դաշտերը չորացել են: Հիշեցնենք, որ Գուլյանը տարածքային կառավարման նախարար Սուրեն Պապիկյանի մերձավոր շրջապատի ներկայացուցիչ է, և կոմիտեում հայտնի է եղել որպես Պապիկյանի հովանավորյալ:

Գուլյանի անունը կապվում էր նաև մեկ այլ սկանդալային դրվագի հետ: 2019 թվականին «Տավուշ» ՋՕԸ Նոյեմբերյանի տեղամասի շուրջ 70 աշխատակիցները նամակով դիմել են ՀՀ վարչապետ Նիկոլ Փաշինյանին՝ տեղեկացնելով այն մասին, որ իրենց աշխատավարձ չի վճարվել օգոստոսի համար՝ մասնակի, սեպտեմբեր, հոկտեմբեր, նոյեմբեր ամիսների համար՝ ամբողջությամբ: Աշխատակիցները վարչապետից աջակցություն են խնդրել, որ Ամանորի նախօրեին իրենց չնչին աշխատավարձները վճարվեն: Այս դիմումից հետո  Հարություն Գուլյանը պահանջել է «Տավուշ» ՋՕԸ Նոյեմբերյանի տեղամասի պետ Գագիկ Վերանյանից աշխատանքից ազատվելու դիմում գրել: Գուլյանը Վերանյանին մեղադրել է «հակավարչապետության» մեջ, թե իբր նա Փաշինյանի մասին ինչ-որ տեղ լավ չի արտահայտվել: Իսկ հիմնական պատճառը փաստացի նշյալ դիմումն է եղել: 

Ուշագրավ է ներկայումս մարզպետի տեղակալի ներկայացրած ֆինանսական հայտարարագիրը: Այսպես, վերջինս «Մեյջոր Փարթներս» ՓԲԸ-ին 2,000,000.00 ՀՀ դրամի հանձնած և վերադարձված փոխառություն է հայտարարագրել, «Եվրոպոլիգրաֆ» ՓԲԸ-ից 850,000.00 ՀՀ դրամի փոխառություն: Գագիկ Վասիլի Հովսեփյանից որպես նվիրատվություն պաշտոնյան ստացել է 400,000.00 դրամ, Ռաչ Միքայելյանից՝ 440,000.00 դրամ, Միքայել Ադիլխանյանից ՝220,000.00 դրամ և 4000 ԱՄՆ դոլար: Ի դեպ, Ադիլխարյանը հենց «Եվրոպոլիգրաֆ» ՓԲԸ-ի տնօրենն է: