Ամենայն Հայոց Կաթողիկոսն ընդունեց Լիբանանի նախագահին

Դեկտեմբերի 10-ին, Մայր Աթոռ Ս. Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Լիբանանի Հանրապետության նախագահ Միշել Սլեյմանին` ուղեկցությամբ ՀՀ Արտաքին գործերի նախարար Էդվարդ Նալբանդյանի:

Վեհափառ Հայրապետը ողջունեց Լիբանանի նախագահի այցը Հայաստանյայց Առաքելական Սուրբ Եկեղեցու հոգևոր կենտրոն՝ անդրադառնալով Մայր Աթոռ Ս. Էջմիածնի հիմնադրման պատմությանը և առաքելությանը հայ ժողովրդի կյանքում: «Մեր ազգային և եկեղեցական պատմությունը հարուստ է մեր երկու ժողովուրդների բարեկամության վերաբերյալ վկայություններով: Եվ ուրախ ենք, որ այսօր հարաբերությունները Հայաստանի և Լիբանանի միջև դարավոր այդ բարեկամության ոգուն համահունչ են զարգանում, վերականգնվում են փոխայցելությունները», - ասաց Ամենայն Հայոց Կաթողիկոսը՝ ընդգծելով, որ Լիբանանն առանձնահատուկ տեղ է գրավում հայ ժողովրդի հոգում:

Իր խոսքում Նորին Սրբությունը, ի դեմս Լիբանանի նախագահի, շնորհակալություն հայտնեց Լիբանանի իշխանություններին և ժողովրդին՝ հայոց մեծ ողբերգությունը՝ Ցեղասպանությունը, ճանաչելու և դատարպարտելու համար, ինչպես նաև Լեռնային Ղարաբաղի խնդրի խաղաղ կարգավորման գործընթացին ցուցաբերվող զորակցության համար:

Իր հերթին՝ Լիբանանի նախագահը շնորհակալություն հայտնեց ջերմ ընդունելության համար, ապա գնահատանքով անդրադարձավ հայերի պատմական ներկայությանը Լիբանանում և կարևոր ծառայությանն երկրի քաղաքական, տնտեսական և մշակութային կյանքում: Պրն. Միշել Սլեյմանը նաև հույս հայտնեց, որ Նորին Սրբությունն առաջիկայում կայցելի Լիբանան:

Հանդիպմանը նաև անդրադարձ կատարվեց Հայ Եկեղեցու միջեկեղեցական և միջկրոնական հարաբերություններին: Վերջում Ամենայն Հայոց Կաթողիկոսը մաղթեց, որ Աստված օրհնի և հարատև զորացնի բարեկամությունն երկու ժողովուրդների:

Այնուհետև Նորին Սրբությունը նախագահին առաջնորդեց Մայր Տաճար և Մայր Տաճարի թանգարան: