ԱԱԾ-ն հերքում է թալիբների առկայությունը Հայաստանում

ՀՀ ազգային անվտանգության ծառայությունը մեկնաբանել է «Հայկական ժամանակ» թերթում տպագրված այն լուրը, թե իբր ահաբեկիչ գրոհայիններ են ներթափանցել Հայաստան:

«Հայկական ժամանակ» թերթում տպագրված այդ լուրը հիմնովին սուտ է և չի համապատասխանում իրականությանը: Այս մասին Lurer.com-ին տեղեկացրեց ՀՀ ԱԱԾ մամուլի կենտրոնի պետ Արծվին Բաղրամյանը:

«Թերթը, ինչ-որ հետին և անհասկանալի նպատակներ հետապնդելով, չպետք է խեղաթյուրի մամուլի պատասխանատուի խոսքը: Երկրի կայունությունն ավելի թանկ է, քան ակնհայտ սուտ տեղեկատվություն հրապարակելը, որը միտված է միայն թերթի սպառումն ապահովելուն»,-նշեց Բաղրամյանը:

Հիշեցնենք, որ այսօր թերթը գրել էր, որ նոր մանրամասներ են հայտնի դարձել Հայաստանում ահաբեկչական հնարավոր գործողության վերաբերյալ ՀՀ իրավապահների ունեցած տեղեկությունների մասին: Ըստ այդմ՝ Հայաստան է ներթափանցել թալիբ ահաբեկիչների մի խումբ:

Ծայրահեղ իսլամիստական ահաբեկչական այդ կազմակերպության գրոհայինների ներթափանցման մասին լուրը, ըստ էության, երեկ չի հերքել ԱԱԾ մամլո քարտուղար Արծվին Բաղրամյանը: «Ես չեմ մեկնաբանում այդ տեղեկությունները: ԱԱԾ-ի աշխատանքը մշտապես ուշադրության կենտրոնում է պահում օրենքով վերապահված բոլոր գործառույթները՝ ուղղված ահաբեկչության դեմ պայքարի հարցերին: Այնպես որ անհանգստության որևէ առիթ չկա»,- «ՀԺ»-ի թղթակցի հարցին ի պատասխան ասել էր Բաղրամյանը: