ՀԱԿ-ն անցկացրեց այս տարվա վերջին հանրահավաքն ու երթը (Տեսաշար)

Դեկտեմբերի 10-ին, ժամը 14:00-ին, Ազատության հրապարակից մեկնարկեց ՀԱԿ-ի ամենամյա երթը՝ նվիրված մարդու իրավունքների պաշտպանության միջազգային օրվան: Այս օրն երթ անցկացնելու ավանդույթը սկիզբ է առել 2008 թ.-ից:

Մինչ երթի սկսելը, հավաքվածների առջև ելույթ ունեցավ ՀԱԿ անդամ, «Հայկական ժամանակ» թերթի խմբագիր Նիկոլ Փաշինյանը, ՀԱԿ անդամ Արամ Մանուկյանը և ՀԱԿ համակարգող Լևոն Զուրաբյանը: «Քաղաքացին, մարդը իրավունք ունի այնքան, որքան նվաճում է այդ իրավունքը: Մենք պետք է հասկանանք մի բան. որևէ իշխանություն, որևէ չինովնիկ մեզ` քաղաքացուն, չի մատուցելու իրավունք, քաղաքացին ինքը պիտի ի վիճակի լինի տեր կանգնելու իր իրավունքին», - իր ելույթում նշեց նա: Մի հատված ելույթից ներկայցնում ենք ստորև.

Նիկոլ Փաշինյանի ելույթին հաջորդեց ՀԱԿ անդամ Արամ Մանուկյանը, ով իր ելույթում խոսեց Մարդու իրավունքների համըդհանուր հռչակագրի վերաբերյալ, ներկայացրեց դրա կարևորությունը ժողովրդավարական հասարակության կառուցման գործում.

Ելույթների շարքն եզրափակեց ՀԱԿ համակարգող Լևոն Զուրաբյանը, ով խոսեց ՀԱԿ-ի ձեռքբերումների մասին մարդու իրավունքների պաշտպանության ասպարեզում: «Այստեղ հավաքված մարդկանց համառ պայքարով կամաց-կամաց պարտադրեցինք բռնապետությանը, որ ազատության սահմաններն այս երկրում ընդլայնվեն», - իր խոսքի մեջ նշեց նա: Ելույթն ամբողջությամբ ներկայացնում ենք ստորև.

Ելույթներից հետո մեկնարկեց երթը, որը առաջնորդում էր ՀԱԿ անդամ, «Հայկական Ժամանակ» օրաթերթի խմբագիր Նիկոլ Փաշինյանը՝ շարժման երիտասարդ համակիրների հետ, գլխավորում էր՝ ՀՀ առաջին նախագահ Լևոն Տեր-Պետրոսյանը:

Ընթացքում Ն. Փաշինյանը պարբերաբար հիշեցնում էր երթի նպատակը, ընթերցում  հոդվածներ 1948 թ.-ի Մարդու իրավունքների համընդհանուր հռչակագրից,  կոչ անում մարդկանց պայքարելու իրենց իրավունքների պաշտպանության համար:

Երթի մասնակիցները «Սերժիկ, հեռացիր», «Լևոն, նախագահ», «Սերժիկ, մարդասպան», «Ազատ, անկախ Հայաստան» վանկարկումներով շարժվեցին դեպի Ա. Միասնիկյանի արձան, որտեղից Իտալիայի և Նալբանդյան փողոցներով վերադարձան Ազատության հրապարակ: Ն. Փաշինյանն երթի ընթացքում հնչեցրեց նաև ՀԱԿ-ի պահանջը՝ քաղբանտարկյալ, ՀԱԿ ակտիվիստ Տիգրան Առաքելյանի ազատ արձակումը: