Ո՞ր դաշինքի նախընտրական ցուցակում է հայտնվել «Ֆլեշի Բարսեղի» մտերիմը

Շարունակում ենք ընթերցողի ուշադրությանը ներկայացնել քաղաքական ուժերի նախընտրական ցուցակներում հայտնված առավել ուշագրավ դեմքերին: Այսօր կանդրադառնանք «Պատիվ ունեմ» դաշինքի 159 համարը հանդիսացող  Ալբերտ Սիմոնյանին, ով «Ֆլեշ» ՍՊԸ-ի տնօրենն է և Բարսեղ Բեգլարյանի մտերիմը: 

Գործարար պատգամավորի թեկնածուն հայտարարագրել է մեկ բնակարան, երկու հողամաս, երեք ավտոմեքենա, 5 միլիոն դրամի և 25 հազար ԱՄՆ դոլարի եկամուտ:

 2018 թվականի հեղափոխությունից հետո, «ՖԼԵՇ» ՍՊ ընկերության շուրջ սկսեցին պտտվել երկու դատական գործեր։ Ըստ Դատալեքս դատական տեղեկատվական համակարգի տվյալների՝ առաջին դատական գործը կապված է 2016 թվականի մարտ-ապրիլ ամիսների ընթացքում ընկերության տեխնիկական գծով նախկին տնօրեն Արման Մկրտումյանի նկատմամբ բռնություն գործադրելու հետ, ինչպես նաև կյանքի և առողջության համար վտանգավոր սպառնալիքներով կատարված ինքնիրավչության՝ վերջինիս օրինական շահերին պատճառելով էական վնաս։ Դատալեքս դատական տեղեկատվական համակարգում նշված է, որ այս դատական գործը ստացվել է 2018 թվականի դեկտեմբերի 3-ին։

Երկրորդ դատական գործը, որը ստացվել է 2020 թվականի հունվարի 31-ին, կապված է դիզվառելիքի սուբսիդավորման գործընթացում իրականացված չարաշահումների հետ, որի պատճառած վնասներն ընկերությունը փոխհատուցել է: