Զինվորներն ու փրկարարները` միասին ընդդեմ սպառնալիքների

Այսօր Բաղրամյան զորավարժարանում ավարտվեցին ՀԱՊԿ օպերատիվ արձագանքման հավաքական ուժերի մասնակցությամբ «Փոխգործակցություն-2012» համատեղ զորավարժությունները։ Փակման պաշտոնական արարողությանը ներկա էին ՀՀ նախագահ Ս. Սարգսյանը, Ազգային անվտանգության խորհրդի քարտուղար Ա. Բաղդասարյանը, ՀԱՊԿ գլխավոր քարտուղար Ն. Բորդյուժան, ՀՀ պաշտպանության նախարար Ս. Օհանյանը, ՌԴ պաշտպանության նախարար Ա. Սերդյուկովը և այլ բարձրաստիճան հյուրեր ՀԱՊԿ բոլոր անդամ պետություններից։

Զորավարժություններին մասնակցում էր շուրջ 2000 մարդ՝ զինված ուժերից, ազգային անվտանգության ծառայությունից, ոստիկանության, արտակարգ իրավիճակների համակարգից և Կարմիր խաչի միջազգային ընկերությունից։

Սկզբում հյուրերը ծանոթացան ցուցադրված ռազմական և հրշեջ-փրկարարական տեխնիկային, իսկ հետո սկսվեց զորավարժությունների գործնական հատվածը։

Սցենարի համաձայն՝ Հայաստանի տարածքը բաժանվել էր 3 պայմանական գոտիների, որոնցից երկուսը ցանկանում էին կոնֆլիկտային իրավիճակ ստեղծել։ Օգնության են հասնում ՀԱՊԿ օպերատիվ արձագանքման հավաքական ուժերը և միասին հետ մղում սադրիչներին։ Օդուժ, հրետանի, հատուկ նշանակության ջոկատներ ու հրշեջ-փրկարարներ. համատեղ ու համաձայնեցված գործողությունների շնորհիվ թշնամու հարձակումը կասեցվեց, ահաբեկիչները՝ ոչնչացվեցին, ռազմական գործողությունների հետևանքով առաջացած հրդեհներն արագ մարվեցին ու փրկվեցին ռմբակոծություներից փլուզված շենքերում հայտնված մարդկանց կյանքերը։

Զորավարժությունների ավարտին ՀՀ նախագահի, ՀՀ ոստիկանության, պաշտպանության և ԱԻ նախարարությունների և ՀԱՊԿ-ի կողմից մեդալներ, պատվոգրեր ու շնորհակալագրեր հանձնվեցին վարժանքի ընթացքում բարձր մասնագիտական պատրաստվածություն ցուցաբերած մասնակիցներին։

ՀՀ պաշտպանության նախարար Ս. Օհանյանը նշեց, որ այս զորավարժությունը չափազանց կարևոր էր ՀԱՊԿ անդամ պետությունների հավաքական ուժերի համար՝ համագործակցության արդյունավետությունը մեծացնելու և հնարավոր սպառնալիքների դեպքում առավել համաձայնեցված գործելու տեսակետից։

ՀՀ ԱԻՆ փրկարար ծառայության տնօրեն, գերենալ-մայոր Ս. Ազարյանի խոսքով՝ առաջին անգամ էր, որ հրշեջ-փրկարարները զինվորականների հետ միասին հավասար մասնակցում են զորավարժությունների, ինչն օգնում է ավելի արդյունավետ արձագանքել ռազմական գործողությունների հետևանքով առաջացած արտակարգ իրավիճակներին։

Արարողությունները եզրափակվեցին ՀՀ ՊՆ նվագախմբի և պատվո պահակախմբի գեղեցիկ ելույթով։