ՀՀ մշակույթի նախարարն ընդունեց Եգիպտոսից ժամանած լրագրողներին

Եգիպտոսից ժամանած լրագրողական խումբը (Ալ Ահրամ և ՎԵՏՕ պարբերականներ) Հայաստան է այցելել մեր երկրի մասին պատմող հոդվածաշար պատրասաստելու նպատակով: Իրենց այցի շրջանակում լրագրողներն այսօր հանդիպեցին ՀՀ մշակույթի նախարար Հասմիկ Պողոսյանին: Ողջունելով հյուրերին՝ նախարարը կարևորեց հայ-եգիպտական մշակութային հարաբերություններն ու համագործակցությունը, ինչպես նաև ներկայացրեց մեր երկու պետությունների համատեղ իրականացրած միջոցառումներն ու ծրագրերը: Մասնավորապես ընդգծվեց նախորդ տարի Ալեքսանդրիայի գրադարանում գումարված «Մերձավոր Արևելքի լեզուներով և երկրներում հրատարակչության և տպագրության պատմությանը նվիրված 4-րդ միջազգային սիմպոզիումում» Հայ գրատպության 500-ամյա հոբելյանը ըստ արժանվույն գնահատելու ու կարևորելու փաստը:

Այնուհետև ՀՀ մշակույթի նախարարը պատասխանեց լրագրողների հարցերին, որոնք հիմնականում առնչվում էին Հայաստանում և արտերկրում իրականացվող մշակութային քաղաքականությանը, հայրենիք-Սփյուռք հարաբերություններին, մեր երկրում ապրող ազգային փոքրամասնությունների խնդիրներին, հարևան երկրներում գոյություն ունեցող հայկական պատմամշակութային հուշարձանների պահպանությանն ու անվտանգությանը: Գրքի համաշխարհային մայրաքաղաք հռչակված Երևանում, լրագրողները, բնականաբար, հետաքրքրվեցին հայ գրատպության պատմությամբ, հայ գրքի ու ժամանակակից գրականության զարգացման խնդիրերով:

Հանդիպման ավարտին ՀՀ մշակույթի նախարարը խաղաղություն մաղթեց մեր երկու երկրներին, ինչի պայմաններում միայն կիրականանա Հայաստանի և Եգիպտոսի միջև անցյալ տարի ստորագրված մշակութային համագործակցության եռամյա ծրագիրը: