Թուրքիայի նախագահը հրաժարվել է Իսրայելի պաշտպանության նախարարի հետ նույն սեղանի շուրջ նստել

Թուրքիայի նախագահ Աբդուլա Գյուլը Վիեննայում ընթացող միջազգային խորհրդաժողովի առիթով տրվող պաշտոնական ճաշի ժամանակ հրաժարվել է Իսրայելի պաշտպանության նախարար Էհուդ Բարաքի հետ նստել նույն սեղանի շուրջ։ Այս մասին հաղորդում է "Haaretz.com" լրատվական կայքը։

Գյուլի աշխատակազմի ներկայացուցիչը հայտնել է, որ, երբ Թուրքիայի նախագահը տեղեկացել է պաշտոնական ճաշին Իսրայելի պաշտպանության նախարար Էհուդ Բարաքի մասնակցության մասին, ինքը հրաժարվել է մասնակցել "World Policy Conference"–ի շրջանակներում տրվելիք ճաշին և այդ կոնֆերանսի բոլոր մասնակիցների հետ ընդհանուր լուսանկարվելուց։ Փոխարենը` Թուրքիայի նախագահն այցելել է Վիեննայի թուրքական թաղամաս։

Հիշեցնենք, որ Իսրայելի և Թուրքիայի միջև դիվանագիտական հարաբերությունները սառեցվեցին այն բանից հետո, երբ իսրայելական զինված ուժերը դեսանտ իջեցրեցին Գազայի ջրերում գտնվող Թուրքական նավի վրա, ինչի հետևանքով նավի վրա գտնվող տաս մարդ զոհվել էր։