Փաշինյանն այսօր ստորագրելու է Սյունիքում ռուսական ռազմաբազա տեղակայելու մասին պայմանագիրը

ԼՈՒՐԵՐ․com-ի տեղեկություններով ՀՀ վարչապետ Նիկոլ Փաշինյանն այսօր՝ ժամը 15։00-ին, ստորագրելու է Սյունիքի մարզում ռուսական ռազմաբազա տեղակայելու մասին պայմանագիրը։

Հիշեցնենք, որ դեռևս ապրիլ 14-ի Ազգային ժողովի իր ելույթում Փաշինյանը հայտարարեց, որ քննարկում են Հայաստանում ռուսական 102-րդ ռազմաբազայի հնարավորությունները հարստացնելու հարցը․ «Նաև արդյունավետ քննարկումներ ենք ունենում Ռուսաստանի մեր գործընկերների հետ Սյունիքի մարզում 102-րդ ռազմաբազայի հենակետ ունենալու վերաբերյալ։ Հեռանկարում մենք պատկերացնում ենք, որ Հայաստանի պետական սահմանների այն հատվածների պաշտպանությունը, որն իրականացնում է Զինված ուժերը, կդրվի սահմանապահների վրա, իսկ բանակի ստորաբաժանումները կզբաղվեն բացարձակապես մարտական պատրաստության և մարտունակության բարձրացման հարցերով։ Արցախի անվտանգությունը կշարունակի իրականացնել Պաշտպանության բանակը՝ ռուսական խաղաղապահ ուժերի հետ համատեղ», - ասել էր Փաշինյանը։

Արդեն մայիսի 3-ին, ԱԺ-ում հատուկ նիստի ժամանակ Փաշինյանը հայտարարեց, որ Սյունիքի մարզում ստեղծվել են 102-րդ ռուսական ռազմաբազայի երկու հենակետեր՝ նշելով, որ սա լրացուցիչ երաշխիք է ոչ միայն Սյունիքի մարզի, այլև ընդհանրապես Հայաստանի անվտանգության ապահովման համար։