Հայաստանից մեկնածների և ժամանածների սալդոն աճել է

ՀՀ ազգային վիճակագրական ծառայության սահմանահատումների հաշվառման տվյալների համաձայն՝ 2012 թ. հունվար-օգոստոսին Հայաստան ժամանածների և մեկնածների թիվը համապատասխանաբար եղել է 1մլն 386 հազար 447 և 1մլն 477 հազար 246: Սալդոն բացասական է` -90 հազար 799:

Ըստ ՀՀ ՏԿՆ Միգրացիոն պետական ծառայության հրապարակած տվյալների՝ նախորդ տարվա նույն ժամանակահատվածի համեմատ օդային տրանսպորտով, երկաթուղով և ավտոտրանսպորտով մեկնածների և ժամանածների թվերի տարբերությունն աճել է 15,5 հազարով կամ 20,7%-ով: Օդային տրանսպորտով սահմանը հատած ուղևորների տեսակարար կշիռը ուղևորափոխադրումների ընդհանուր ծավալում կազմել է 41,8%:

Ընթացիկ տարվա առաջին 8 ամիսներին ուղևորահոսքերի ընդհանուր ծավալը նախորդ տարվա նույն ժամանակահատվածի համեմատ ավելացել է 287,7 հազարով կամ 11,2%-ով և կազմել 2 մլն 863,7 հազար մարդ:

Օգոստոսին միջազգային ուղևորահոսքերի բացասական մնացորդը եղել է 7 հազար նախորդ տարվա օգոստոսի 3,4 հազար դրական մնացորդի դիմաց: Ի տարբերություն օդային տրանսպորտով երկրի սահմանը հատածների` երկաթուղով և ավտոտրանսպորտով ուղևորափոխադրումների սալդոն դրական է: