Սերժ Սարգսյանը ցավակցական հեռագիր է հղել Ջիվան Գասպարյանի մահվան կապակցությամբ

ՀՀ երրորդ նախագահ Սերժ Սարգսյանը ցավակցական հեռագիր է հղել Գասպարյանների ընտանիքին` ՀՀ ժողովրդական արտիստ, անվանի դուդուկահար եւ կոմպոզիտոր Ջիվան Գասպարյանի մահվան կապակցությամբ: Այս մասին տեղեկանում ենք ՀՀ 3-րդ նախագահի գրասենյակի ֆեյսբուքյան էջից։

«Խոր ցավով տեղեկացա հայ երաժշտարվեստի զարգացման եւ հանրահռչակման գործում իր մեծագույն ներդրումն ունեցած՝ լեգենդար դուդուկահար Ջիվան Գասպարյանի մահվան մասին:

Հատկապես Վարպետի շնորհիվ հայկական ծիրանափողը նվաճեց համաշխարհային նոր բեմեր ու էկրաններ՝ հպարտության եւ ոգեւորության բազում անկրկնելի պահեր պարգեւելով ինչպես աշխարհասփյուռ հայությանը, այնպես էլ միլիոնավոր երաժշտասերների` աշխարհի տարբեր ծայրերում:

Ես եւս ուրախ եմ, որ առիթ եմ ունեցել Ջիվան Գասպարյանի կյանքի օրոք վայելելու նրա բարձրարվեստ կատարումները եւ պետության կողմից գնահատելու անվանի երաժշտի ու կոմպոզիտորի  մեծ վաստակը:

Ջերմությամբ եմ հիշում մեր բոլոր հանդիպումներն ու զրույցները:

Խորին ցավակցություն եւ զորակցություն եմ հայտնում Գասպարյանների ընտանիքին, Ջիվան Գասպարյանի արվեստի միլիոնավոր երկրպագուներին եւ մեր ամբողջ ժողովրդին՝ այս մեծ կորստի կապակցությամբ»,- նշվում է ցավակցական հեռագրում։