ՄԱԿ-ի կառույցներն առաջարկում են տարածաշրջանում կիրառել Հայաստանի փորձը

2012թ. սեպտեմբերի 19-ից 20-ը ՀՀ աշխատանքի և սոցիալական հարցերի նախարար Արտեմ Ասատրյանի գլխավորած պատվիրակությունը մասնակցեց ՄԱԿ-ի Եվրոպայի տնտեսական հանձնաժողովի Ծերացման հարցերով Վիեննայում կազմակերպված նախարարական համաժողովին:

Համաժողովը կազմակերպվել էր Ավստրիայի Հանրապետության կառավարության կողմից, որին մասնակցում էին մոտ 50 երկրի կառավարական պատվիրակություններ:

Բնակչության ծերացման հարցը ռազմավարական խնդիր է դարձել միջազգային, տարածաշրջանային և ազգային սոցիալ-տնտեսական զարգացման համատեքստում: Անդամ երկրների կառավարությունները դեռևս 2002թ. պարտավորություն էին ստանձնել ապահովել Ծերացման հիմնահարցերի մադրիդյան միջազգային գործողությունների պլանի կատարումը:

Այս ուղղությամբ ՀՀ կառավարությունը ձեռնարկել է համապատասխան քայլեր և արձանագրել լուրջ առաջընթաց տարածաշրջանի մակարդակով:

ՄԱԿ-ի Եվրոպայի տնտեսական հանձնաժողովի Գործադիր քարտուղարն իր ելույթում հատուկ անդրադարձ կատարեց ՀՀ կառավարության կողմից ձեռնարկված քայլերին: Մասնավորապես, տարածաշրջանում Հայաստանն առաջին երկիրն է, որ համապարփակ հետազոտական աշխատանքների արդյունքների հիման վրա մշակեց Ծերացման հիմնահարցերի լուծման ճանապարհային քարտեզ, իսկ 2012թ. օգոստոս ամսին ՀՀ կառավարության կողմից ընդունվեց ոլորտում առաջին համապարփակ ռազմավարական փաստաթուղթը:

ՄԱԿ-ի Եվրոպայի տնտեսական հանձնաժողովը կարևորեց Հայաստանի փորձի տարածումը տարածաշրջանի մյուս երկրներում:

Համաժողովի ընթացքում ելույթով հանդես եկավ ՀՀ աշխատանքի և սոցիալական հարցերի նախարար Արտեմ Ասատրյանը՝ ներկայացնելով ծերացման հիմնահարցերի հետ կապված Հայաստանում առկա իրավիճակը, ՀՀ կառավարության կողմից ձեռնարկված քայլերն ու ընթացիկ բարեփոխումները:

Նախարարն առանձին հանդիպումներ ունեցավ նաև տարբեր երկրների իր գործընկերների, միջազգային կառույցների ներկայացուցիչների հետ: