Ում դեմ հարուցված քրեական գործերն են «ջրվել»՝ Փաշինյանի հիմնադրամին կատարած փոխանցումներից հետո

Հեղափոխությունից հետո Հայաստանում բավական հաճախակի են դարձել այնպիսի տարակուսելի զուգադիպությունները, երբ նախկին կամ ներկա այն պաշտոնյաները, ովքեր ներգրավված են այս կամ այն քրեական գործում, սիմվոլիկ գումար հանգանակելով վարչապետ Նիկոլ Փաշինյանի ընտանեկան հիմնադրամին` ինչ-որ հրաշքով այլևս դադարում են լինել քրեական գործերի ֆիգուրանտներ:

Դիցուք՝ Գագիկ Խաչատրյանի ընտանիքին պատկանող «Մեգասպորտ» ՍՊԸ-ն «Իմ քայլը» հիմնադրամին է փոխանցել 5,930,940 դրամի նվիրատվություն: Գագիկ Խաչատրյանը, ինչպես գիտենք, քրեական գործով էր անցնում և մեղադրվում էր առանձնապես խոշոր չափերի չարաշահման համար, սակայն, այսօր Խաչատրյանը գրավով ազատ արձակված է:

Ալեքսանդր Արզումանյանը, ով որպես վկա անցնում էր Մարտի 1-ի գործով և կանչվել էր հարցաքննության, «Իմ քայլը» հիմնադրամին էր փոխանցել 1,983 եվրո:

«Մոս ֆիշը», որը պատկանում է ՀՀԿ խմբակցության նախկին պատգամավոր Սամվել Ալեքսանյանի ընտանիքին, հայտնվել է դատախազության ուշադրության կենտրոնում: Այս ձկնաբուծարանը կառուցվել էր ինքնակամ՝ առանց համապատասխան փաստաթղթերի և վճարների։ Ուշագրավ է, որ «Մոս ֆիշը» «Իմ քայլը» հիմնադրամին է փոխանցել 1,000,000 ՀՀ դրամ:

Ջրային կոմիտեի նախկին նախագահ Ինեսա Գաբայանի դեմ կարող է քրեական գործ հարուցվել, այս մասին վերջին շրջանում ակտիվորեն գրում է մամուլը: Գաբայանը «Իմ քայլին» փոխանցել է 700,000 ՀՀ դրամ:

«Գաջեգործ» ՓԲԸ-ում, որը պատկանում  է Քալանթարյանների ընտանիքին իրականացված ստուգման արդյունքում հաշվարկվել է 3.743.063 ՀՀ դրամի չափով շրջակա միջավայրին հասցված վնաս, նաև նշանակվել 100.000 ՀՀ դրամի չափով վարչական տուգանք: Հենց այդքան էլ ՓԲԸ-ն փոխանցել է «Իմ քայլը» հիմնադրամին: Բացի այդ, «Քալանթարյան Ֆէմիլի» ՓԲԸ-ն հավելյալ 50 հազար դրամ է փոխանցել:

«Երևանի սիթի» սուպերմարկետների ցանցը որը պատկանում է Սամվել Ալեքսանյանին «Իմ քայլին» է փոխանցել 34,500,000 ՀՀ դրամ: Հիշեցնենք, որ Սամվել Ալեքսանյանի նկատմամբ քրեական գործ էր հարուցվել՝ հարկեր չվճարելու մասով, սակայն որևէ այլ զարգացում այդ քրեական գործի շրջանակներում այդպես էլ տեղի չունեցավ:

ՊԵԿ-ը 2019-ի տարեվերջին քրեական գործ  էր հարուցել ՀԷՑ-ի դեմ. Այդ նույն ժամանակ ՀԷՑ-ը «Իմ քայլը» հիմնադրամին է փոխանցել 33,530,000 ՀՀ դրամ: Քրեական գործը այնուհետև պարզապես ջրվել է:

«Ֆլեշ» ՍՊԸ-ն, որը պատկանում է Սերժ Սարգսյանի մտերիմ Բարսեղ Բեգլարյանին՝ Ֆլեշի Բարսեղին, «Իմ քայլը» հիմնադրամին է փոխանցել 5,000,000 ՀՀ դրամ: Հիշեցնենք, որ ձեռք բերված ապացույցների հիման վրա՝ «Ֆլեշ» ՍՊԸ-ի նախագահ Բարսեղ Բեգլարյանին և «Ֆլեշ» ՍՊԸ-ի «Քանաքեռ» բազայի պետ Հ.Հովսեփյանին մեղադրանք է առաջադրվել՝ ՀՀ քրեական օրենսգրքի 322-րդ հոդվածի 2-րդ մասով: Վերջիններիս նկատմամբ որպես խափանման միջոց է ընտրվել ստորագրություն՝ չհեռանալու մասին:

«Մաքս օիլ» ՍՊԸ-ն «Իմ քայլին» է փոխանցել 1,000,000 ՀՀ դրամ: Ընկերության 100 տոկոսանոց բաժնետերը ՀՀԿ-ական նախկին պատգամավոր Հարություն Փամբուկյանն է, որին պատկանող ընկերությունը բենզինի շուկայի առաջտարներից էր: Այն եղել է նաև Հայաստան ավիավառելիք ներմուծող հինգ խոշոր ընկերություններից մեկը: «Մաքսհուր» և «Ֆլեշ» ընկերությունների անուններն են շրջանառվում երրորդ նախագահ Սերժ Սարգսյանին մոտ կես միլիարդ դրամի հափշտակության կատարումը կազմակերպելու քրեական գործում:

Վերը նշված բոլոր քրեական գործերը կամ կարճ ժամանակի ընթացքում պարզապես ջրվել են, կամ այդ քրեական գործերով անցնող անձինք գրավով/ ստորագրությամբ ազատ են արձակվել: Այս հանգամանքը ինքնին ուշադրության արժանի է այն պնդումների համատեքստում, որ Նոր Հայաստանում կոռուպցիոն սխեմաներ այլևս չեն գործում...