Արցախի ԱԺ նախագահն այցելել է ՀՀ-ում Արցախի կառավարության շտաբ, քննարկվել են տեղահանվածներին օգնություն տալու հարցը

Հուլիսի 12-ին Արցախի ԱԺ նախագահ Արթուր Թովմասյանը  Երևանում հանդիպել է ՀՀ-ում ԱՀ կառավարության օպերատիվ շտաբի պետ Միքայել Վիրաբյանի հետ:

Արցախի ԱԺ-ից հայտնում են, որ հանդիպմանը Արցախի խորհրդարանի նախագահին է ներկայացվել  իրականացվող աշխատանքների և միջոցառումների ընթացքը, ինչպես նաև՝ տեղահանվածներին տրամադրվող 68 հազարական և որպես վարձավճար  տրամադրվող 30 հազարականների կարգի և ընթացքի մասին տեղեկատվություն: Արթուր  Թովմասյանը կարծիք է հայտնել՝ առնվազն  մինչև տարեվերջ տեղահանված արցախցիներին 68 հազարական դրամի տրամադրման գործընթացի շարունակականության օգտին:

Հանդիպման ընթացքում քննարկվել է նաև Արցախից տեղահանված և ՀՀ-ում ապաստանած մոտ երեք հարյուր շրջանավարտների հետագա ճակատագչի հարցը: Շոշափվել է նաև առաջին դասարան հաճախող երեխաների հաշվառման խնդիրը:

Կայացվել է որոշում՝ դպրոց հաճախող առաջին դասարանցիներին Շտաբի կողմից պայուսակի և գրենական պիտույքների տրամադրման մասին: