Սպանել «Մուսուլմանների անմեղությունը» ֆիլմի ստեղծողներին

Եգիպտոսում սալաֆի իմամ Ահմեդ Ֆուադ Աշուշը ֆեթվա է արձակել, որով պահանջում է սպանել բոլոր նրանց, ովքեր մասնակցել են հակաիսլամական «Մուսուլմանների անմեղությունը» ֆիլմի ստեղծմանը: Իմամը «ԱՄՆ և Եվրոպայի երիտասարդ մուսուլմաններին», ըստ իրենց կրոնական համոզմունքների, կոչ է արել սպանել ֆիլմի հեղինակներին և դերասաններին, ինչպես նաև բոլոր նրանց, ովքեր մասնակցել են դրա տարածմանը, քանի որ «նրանք մեղավոր են Մուհամեդ մարգարեին վիրավորելու մեջ»:

Նշենք, որ Ֆիլմի տեղադրումը համացանցում հանգեցրեց իսլամական երկրներում հակաքրիստոնեական բռնության և ԱՄՆ-ի դեմ ուղղված ցույցերի ալիքի առաջացմանը:

Եգիպտոսի իշխանությունները պահանջում են իրենց հանձնել այժմ ԱՄՆ-ում գտնվող յոթ ղպտիներին: Նրանց մասնակից են համարում աղմկահարույց «Մուսուլմանների անմեղությունը» ֆիլմի ստեղծմանը: Մյուսներից զատ, փնտրվում է նաև ֆիլմի պրոդյուսեր Նիկոլա Բասիլի Նիկոլան, ինչպես նաև ամերիկացի Թարի Ջոնսը, ով հայտնի է դարձել նրանով, որ բազմիցս հանդես է եկել հակաիսլամական կարգախոսներով:

Եգիպտական գլխավոր դատախազության պաշտոնական դիմումն արդեն ուղարկվել է Ինտերպոլ: Բացի այդ, օրերս ալ-Ազհար մզկիթի իմամ Ահմեդ ալ-Թայիբը պահանջել է «միջազգային որոշում» ընդունել, որը կարգելի իսլամի ցանկացած ոտնահարում: Դա տեղի է ունեցել ԱՄՆ-ում նկարահանված Մուհամեդ մարգարեին վիրավորող ֆիլմի պատճառով առաջացած բռնության դրսևորումներից հետո:

Սունի հոգևորականը հավելել է, որ այդ որոշումը պետք է «քրեական պատասխանատվություն նախատեսի իսլամի և այլ կրոնների խորհրդանիշերին վիրավորանք հասցնելու համար»:

Ալ-Թայիբի կարծիքով, ՄԱԿ-ի վրա դրված է ցանկացած վտանգից կամ հարձակումից աշխարհում խաղաղությունը պաշտպանելու պատասխանատվությունն այնպես, որ «ապագայում չկրկնվեն նման վտանգավոր դրվագներ»:

Հիշեցնենք, որ YouTube-ում հայտնված «Մուսուլմանների անմեղությունը» ֆիլմի անոնսը, որը իսլամի շատ հետևորդներ սրբապիղծ են համարել, իսլամական երկրներում հրահրեց ամերիկյան դեսպանատների վրա հարձակումը, որի հետևանքով լիբիական Բենղազի քաղաքում սեպտեմբերի 11-ին սպանվեցին Լիբիայում ԱՄՆ դեսպան Քրիստոֆեր Սթիվենսը և ևս 3 ԱՄՆ քաղաքացիներ: