«10 միլիոն ծառ»-ի արշավը հապաղում է. տնկվել է ընդամենը 702 280 հատ ծառ

Հայաստան 15 Հուլիս, 2021 15:43

2020 թվականի մարտի 7-ին վարչապետի պաշտոնակատար Նիկոլ Փաշինյանը Շրջակա միջավայրի նախկին նախարար Էրիկ Գրիգորյանի հետ այցելել էր Լոռու մարզ։ Դենդրոպարկում տնկել էին սերմ և խոսել 10 միլիոն ծառ տնկելու ծրագրի մասին, իսկ նախկին նախարար Էրիկ Գրիգորյանն էլ ասել էր․ «10 միլիոն ծառ տնկելու գաղափարը կապված է 10 միլիոն աշխարհասփյուռ հայերի հետ»։ ԼՈՒՐԵՐ․com-ը հարցում էր ուղարկել Շրջակա միջավայրի նախարարություն՝ պարզելու, թե արդյոք նախկին նախարարի տված խոստումը շարունակելո՞ւ է Շրջակա միջավայրի նախարար Ռոմանոս Պետրոսյանը և մինչ օրս քանի՞ ծառ է տնկվել։ Ի պատասխան մեր հարցման՝ նախարարությունից հայտնում են, որ «10 միլիոն ծառ» բնապահպանական նախաձեռնության շրջանակներում 2020-2021թթ-ին Հայաստանի տարածքում տնկվել է 702280 ծառ․ «Այստեղից ՀՀ մարզպետարաններին և Երևան քաղաքին 2021 թվականի գարնանը տրամադրվել է 161480 հատ ծառ։ Անտառային կոմիտեի «Հայանտառ» ՊՈԱԿ-ի «Անտառտնտեսություն» մասնաճյուղերի տարածքներում (Լոռու, Տավուշի, Սյունիքի, Շիրակի, Արագածոտնի, Կոտայքի, Գեղարքունիքի մարզերում) 2020 թվականին տնկվել է 339000 և 2021 թվականի գարնանը՝ 201800 ծառ»,- փոխանցել են այնտեղից։

Նախարարությունից տեղեկացնում են, որ «10 միլիոն ծառ» բնապահպանական նախաձեռնության շրջանակներում տնկումներ կատարելու համար ՀՀ պետական բյուջեից, որպես առանձին միջոցառում, «Հայանտառ» կազմակերպությանը գումար չի հատկացվել․ «Նախաձեռնությունն իրականացվում է բացառապես դոնոր կազմակերպությունների կամ «Հայանտառ» ՊՈԱԿ-ի սեփական միջոցների, խնայողությունների, տնկարաններում առկա ծառերի կամ բնական վերաճի արդյունքում դուրս հանված շիվերի միջոցով»։

Պարզվում է՝ «10 միլիոն ծառ» նախաձեռնության շրջանակում Լիտվայի Հանրապետությունը շուրջ 10 հազար կեչու ծառ է նվիրաբերել Հայաստանին․ «Լիտվական անտառը հիմնվել է Լոռու մարզում՝ «Հայանտառ» ՊՈԱԿ-ի «Վանաձորի անտառտնտեսություն» մասնաճյուղի Խնձորուտի անտառապետության տարածքում»,- տեղեկացնում են Շրջակա միջավայրի նախարարությունից։

Նշենք, որ «10 միլիոն ծառ» համահայկական նախաձեռնության մեկնարկը տրվեց այս տարի ապրիլի 10-ին, Արագածոտնի մարզում։ Քուչակ գյուղին հարող տարածքում տնկվել էին ծառատունկերի մեկնարկն ազդարարող առաջին 1000 ծառերը։

Հաշվի առնելով կորոնավիրուսի տարածման արդյունքում ստեղծված իրավիճակը՝ ծառատունկը հետաձգվել էր մինչև 2021 թվական։