Հարվարդի համալսարանում տեղի է ունեցել Հականոբելյան մրցանակաբաշխություն

Սեպտեմբերի 20-ին Հարվարդի համալսարանում տեղի է ունեցել Հականոբելյան մրցանակաբաշխության հանդիսավոր արարողությունը (Ig Nobel prize)։ Ըստ Reuters-ի՝ մրցանակները շնորհվել են 10 անվանակարգերում՝ գիտության բնագավառում ամենակասկածելի ձեռքբերումների համար։

Հականոբելյան մրցանակի է արժանացել նաև ռուս ինժեներների մի խումբ՝ Իգոր Պետրովի գլխավորությամբ։ Չելյաբինսկ շրջանի Սնեժինսկ քաղաքի SKN ընկերության մասնագետները մշակել են տեխնոլոգիա, որը թույլ է տալիս ադամանդի վերածել հին պայթուցիկը։

Հոլանդացի հոգեբանները մրցանակի են արժանացել հետազոտության համար, որը բացատրում է, թե ինչու է Էյֆելյան աշտարակը ցածր թվում, եթե նրան նայես դեպի ձախ կողմ թեքված։

Ճապոնացի գիտնականները մրցանակ են ստացել Speech Jamme սարքի համար, որը թույլ է տալիս դադարեցնել շատախոս մարդու ձանձրացնող խոսքը վերջինիս ապակողմնորոշման ճանապարհով։

Բացի այդ՝ մրցանակը շնորհվել է մի խումբ ամերիկացի հետազոտողների, որոնք հայտնաբերել են, որ շիմպանզեները կարող են ճանաչել մյուս շիմպանզեներին մեջքի տեսքից։

Հականոբելյան մրցանակը, որը Ռուսաստանում հայտնի է Շնոբելյան մրցանակ անունով, ստեղծվել է 1991 թվականին The Annals of Improbable Research հումորային ամսագրի խմբագիր Մարկ Աբրահամսի կողմից։ Նշենք նաև, որ Հականոբելյան դափնեկիրներին մրցանակ շնորհում են Նոբելյան մրցանակակիրները։